Сүхбаатар дүүргийн III хорооны нутаг дэвсгэрт байрладаг “Cante” шөнийн цэнгээний газрын үүдэнд энэ сарын 18-наас 19-нд шилжих шөнийн 03.45 цагийн үед зодоон болж, нэг залуу бусдад зодуулж хүнд гэмтсэн харамсалтай хэрэг гарсан.

Хохирогч С-г найзуудтайгаа баарнаас гарч явахад “Эрэл”-ийн Эрдэнэбатын хүү Тэмүүлэн, “GEM групп”-ийн Ц.Цэрэнпунцагийн хүү Санжаачойпэл, “Таванбогд”-ын Ц.Баатарсайханы хүү Амарсайхан нар агсам тавин зодож, хүнд гэмтээсэн. Иргэн С гавал, тархины маш хүнд гэмтэлтэй ГССҮТ-д хэвтэн эмчлүүлж байгаад гадаад улсад хагалгаанд орохоор явсан билээ.

Зодооны хэрэгт холбогдож, эрэн сурвалжлагдаж буй “Таванбогд” группын захирал Ц.Баатарсайханы хүү, "Говь" ХК-ийн Гүйцэтгэх захирал Б.Амарсайхан энэ сарын 27-нд буюу өнгөрсөн даваа гарагт Монголд ирэх ёстой байв.

Хууль хяналтын байгууллагын эх сурвалжуудын мэдээлж буйгаар, тэрбээр зодооны хэрэгт холбогдсоныхоо дараа буюу энэ сарын 20-ны ням гарагт хилээр гарч явжээ. Тэр хуулийнханд "Найз охины бие гэнэт муудсан. Зайлшгүй очих шаардлагатай байна. Энэ сарын 27-нд буцаж ирнэ" гэж хэлээд, хил давсан аж.

Яллагдагч Б.Амарсайхан өнөөдрийн байдлаар Монгол Улсад буцаж ирээгүй байгаа тул хууль хяналтын байгууллагаас Б.Амарсайханыг Интерполын Улаан булангаар эрэн сурвалжлуулах хүсэлтээ хүргүүлжээ. Тус товчооноос хүсэлтийг хүлээн авснаар Б.Амарсайханы зургийг Интерполын Улаан буланд албан ёсоор байршуулж, эрэн сурвалжлах юм байна.

Эх сурвалжийн мэдээлснээр, Б.Амарсайхан БНСУ руу явсан бөгөөд тэндээсээ өөр улс руу нисжээ. Түүнийг ирсэн даруйд хар тамхины тест авах төлөвлөгөөтэй байгаа талаараа хууль хяналтын байгууллагынхан мэдэгдэж байв. Хар тамхи хэрэглэсэн эсэх шинжилгээний хариу 30 хоногийн дотор гардаг байна.

Б.ЖАРГАЛ