Төв аймгийн цагдаагийн хэлтсээс УИХ-ын гишүүн асан Л.Гүндалайд зөрчлийн хэрэг үүсгэн шалгаж эхэлсэн талаар эх сурвалж мэдээлэв.

Тодруулбал, Л.Гүндалай Улаанбаатар-Дархан чиглэлийн авто зам дээр тээврийн хэрэгслийг гүйцэж түрүүлэхдээ 80 км цагаас дээш хурдтай явж буй бичлэгээ олон нийтийн сүлжээнд нийтэлсэн.

Иргэн Л.Гүндалайн тус бичлэгт авто замын хоёрдугаар эгнээнд явж буй тээврийн хэрэгслийг гүйцэж түрүүлэхдээ "Нэгдүгээр эгнээнд явахаас өөр сонголт байхгүй байна. Тус автомашин гүйцэж түрүүлж байгаа автомашинд зам тавьж өгөх ёстой" гэжээ.

Мөн "Цагдаагаас 144 хурдтай лайваа ав гэнээ. Би зориуд тавьсан юм. 80 тай явна гэж байхгүй шүү" гэсэн мэдээллийг өөрийн facebook хуудастаа бичсэн байв.

Тэрбээр хэдхэн цагийн өмнө цахим хуудастаа "Дээд хурд нь 80-тай улс дэлхийд ганцхан Монгол шүү. 80 бол тэнэг биз дээ, тийм үү" хэмээн бичжээ.

Харьяаллын дагуу Төв аймгийн цагдаагийн хэлтэс Иргэн Л.Гүндалайд хурд хэтрүүлсэн үйлдлийг нь үндэслэн зөрчлийн хэрэг нээн шалгаж эхэлжээ.

Б.ЖАРГАЛ