“Сэтгүүл зүйн ёс зүйн форум 2025” буюу JEF-2025 энэ оны аравдугаар сарын 10-ны баасан гарагт зохион байгуулагдана. Хэвлэл мэдээллийн зөвлөл (ХМЗ)-өөс зургаа дахь удаагаа зохион байгуулж буй тус форум энэ жил “Дижитал эрин үеийн ёс зүй: Хиймэл оюуны сорилт ба боломж” сэдвийн дор өрнөх юм.

Хэвлэл мэдээллийн салбар дижитал шилжилт, хиймэл оюуны эринд хүчтэй хөл тавьж буй энэ цаг үед, нийтийн эрх ашгийн төлөөх шударга, хараат бус, ёс зүйтэй сэтгүүл зүйн үнэ цэн улам бүр тодорч, эрхэм чанар нь алдагдахгүй байхын төлөө салбарынхан нэгдэж, хамтран хэлэлцэх шаардлага үүсээд байна.

Энэ үүднээс ХМЗ нь сэтгүүл зүйн ёс зүйн үндсэн зарчмыг хамгаалах, хөгжүүлэх, мэргэжлийн нэгдмэл ойлголт, хандлагыг бэхжүүлэх зорилгоор энэхүү арга хэмжээг уламжлал болгон зохион байгуулсаар ирсэн билээ.

Форумын гол анхаарлын төвд хиймэл оюуны технологи сэтгүүл зүйд хэрхэн нэвтэрч, ямар боломж, сорилтууд бий болгож байгаа тухай илтгэл, хэлэлцүүлгүүд өрнөнө. Үүнтэй уялдуулан:

• Мэдээллийн нууцлал, өгөгдлийн аюулгүй байдал

• Хэрэглэгчийн эрх ба мэдээллийн боловсрол

• Зохиогчийн эрх, ёс зүйн хэрэглээ

• Мэдээллийн чөлөөт урсгал, цензур
  гэх мэт түлхүүр асуудлуудыг олон талын оролцоотойгоор хөндөж, сэтгүүл зүйн ирээдүйг хэлэлцэнэ.

Форумын нэг чухал хэсэгт ХМЗ-ийн Ёс зүйн хороодын гишүүд оролцож, сэтгүүл зүйн бүтээлтэй холбоотой ёс зүйн нийтлэг зөрчлүүд, тэдгээрийн шалтгаан, үр дагавар, хорооны дүгнэлт, зөвлөмж зэргийг танилцуулах юм. Энэ нь салбарын дотоод хяналт, мэргэжлийн ёс зүйн хариуцлагыг улам бэхжүүлэх алхам болохыг онцолж байна.

Мөн төр, иргэний нийгмийн байгууллагуудын төлөөлөл хүний эрхийн хүрээний сэдвээр санал бодлоо солилцож, хувь хүн, байгууллага, улсын түвшинд бид юуг анхаарч, хэрхэн хариуцлагатай оролцогч байх талаар ярилцах юм.

ХМЗ нь “Ёс зүйн өдрүүд”-ийг анх 2016 онд эхлүүлж, 2017 оноос эхлэн “Ёс зүйн форум” хэлбэрээр жил бүр зохион байгуулж иржээ. Өмнөх форумууд дараах сэдвүүдийг хөндөж байв:

• 2017 он – Хэвлэл мэдээллийн эрх зүйн ба ёс зүйн зохицуулалт

• 2018 он – Мэргэжлийн сэтгүүл зүй ба дижитал эрин үе

• 2019 он – Хэвлэлийн эрх чөлөө ба дижитал хувьсал

• 2022 он – Ковид-19: Мэдэх эрх ба сэтгүүлчийн ёс зүй

• 2023 он – Сэтгүүл зүйн ёс зүй: Эрх чөлөөгөө хадгалж, итгэлийг олж авах нь

• Дижитал эринд мэдээллийн найдвартай байдал, нийтийн итгэлцэл, сэтгүүл зүйн нэр хүндийг хадгалах

• Ёс зүйн зохицуулалтыг бэхжүүлэх

• Иргэдийг ёс зүйгүй, худал мэдээллээс хамгаалах

• Сэтгүүлчид, редакц, төр, иргэний нийгмийн хамтын ажиллагааг өргөжүүлэх

• Мэдээллийн эрх чөлөө ба хүний эрхийн тэнцвэрийг хангах

Сэтгүүл зүйн орчин шинэ технологи, шинэ орчин нөхцөлд хувьсан өөрчлөгдөж буй энэ үед, ёс зүйн зарчимтай, хариуцлагатай сэтгүүл зүй нь нийгмийн эв нэгдэл, шударга ёс, тогтвортой хөгжлийн суурь хэвээр байсаар байна. Тиймээс энэ форум нь зөвхөн салбарын мэргэжилтнүүд төдийгүй мэдээлэл хэрэглэгч, иргэн бүрийн анхааралд хандсан чухал үйл явдал байх болно.