АНУ-ын Ерөнхийлөгч Дональд Трамп БНХАУ-ын айлчлалаа өнөөдөр эхлүүлнэ

Түүний айлчлал тавдугаар сарын 13–15-ны хооронд үргэлжлэх бөгөөд энэ нь бараг арван жилийн дараах АНУ-ын ерөнхийлөгчийн Хятадад хийх анхны айлчлал болох юм. Мөн дэлхийн хамгийн том хоёр эдийн засгийн харилцаанд чухал үе дээр болж байна.

Boeing, Citigroup, Qualcomm зэрэг Америкийн томоохон компаниудын удирдлагууд Трамптай хамт явах төлөвтэй байгаа бөгөөд Хятадын компаниудтай хэлэлцээр хийх магадлалтай байна.

Энэ айлчлал нь Вашингтон, Бээжингийн хоорондын эмзэг худалдааны түр эвлэрлийн чухал сорилт болно гэж үзэж байна.

2025 оны 4-р сард Трамп дэлхийн олон оронд, холбоотон эсэхээс үл хамааран өргөн хүрээтэй импортын татвар зарласан.

Үүний томоохон үр дагавар нь АНУ, Хятадын хооронд харилцан өндөр татвар ногдуулсан худалдааны дайн болж, тарифууд 100 хувиас давсан юм.

Эдгээр татварыг Трамп, Ши Жиньпин нар Өмнөд Солонгост өнгөрсөн 10-р сард нүүр тулан уулзсаны дараа түр зогсоосон. Гэсэн ч хоёр талын сүрдүүлэг, хурц мэдэгдлүүд үргэлжилсээр байна.