Японы мэргэжлийн сүмо бөхийн хаврын тэмцээн өчигдөр өндөрлөлөө. Гуравдугаар сарын башёд 69 дэх их аварга Хакүхо М.Даваажаргал өвдөг шороодолгүй 15 давж түрүүллээ. Тэрээр 15 дахь өдөр нутаг нэгт их аварга Какүрюү М.Анандыг давжээ. Их аварга Хакүхогийн хувьд тэрээр өнгөрсөн 2018 оны есдүгээр сарын башёд мөн өвдөг шороодолгүй түрүүлсэн юм.

Гуравдугаар сарын башёд Хакүхо их аваргатай эн тэнцүү өрсөлдөх бөх гараагүй бөгөөд түүний араас хамгийн ойрхон нэхэж 14 даваа, нэг унаатайгаар тэмцээнийг өндөрлөсөн Ичиножёо А.Ичинноров ирэх сард саняакү буюу өндөр цолд хүрэх магадлалтай болжээ. Их аварга Какүрюү М.Ананд 10 даваа, таван унаатайгаар тэмцээнийг өндөрлүүлсэн бол нэгдүгээр сарын башёгийн тэргүүн бөх Тамаваши Б.Мөнх-Оргил энэ сард тааруухан барилдаж таван даваа, 10 унаатайгаар тэмцээний дуусган, цолоо хураалгах нь тодорхой болсон байна.

Гуравдугаар сарын башёгийн шукун шо буюу гарамгай барилдааны шагналыг Ичиножёо А.Ичинноров, канто шо буюу дайчин барилдааны шагналыг Аойями, гино шо буюу техниктэй бөхийн шагналыг Такакейшо нар тус тус хүртжээ.