Монголын эмэгтэйчүүдийн холбооноос өнөөдөр мэдээлэл хийлээ. Тус холбооноос хүчирхийлэлд өртсөн хүүхэд, эмэгтэйчүүдийн өмнөөс шүүхэд нэхэмжлэл гаргахаар болсон байна. Ингэхдээ эхний ээлжинд шийдвэр гаргагчдад хандан шаардлага хүргүүлэхээр болжээ. Тус шаардлагын эхэнд Гэр бүлийн тухай хуулийн энэ хаврын чуулганаар яаралтай батлахыг хүсчээ. Учир нь гэр бүлийн тухай хууль 2006 оноос хойш улс төрийн шалтгаанаар хэлэлцэгдэхгүй өнөөдрийг хүрсэн. Тиймээс улстөржилтгүйгээр хэлэлцэж, батлах ёстой хэмээн тус холбооны удирдлага үзэж байна.

Мөн шүүхийн шийдвэр гүйцэтгэл болон зөрчлийн тухай хуулинд яаралтай нэмэлт өөрчлөлт оруулахыг шаарджээ. Өрх толгойлсон 72 мянган эмэгтэй, насанд хүрээгүй 36 мянган хүүхдийн эрх ашгийг хөндөгдөж байна. Тиймээс хүүхдийн тэтгэмж төлөхгүй байгаа хүмүүст хариуцлага тооцдог системыг хуулинд тусгахыг шаардаж байгаагаа МЭХ-ны ерөнхийлөгч Б.Оюунгэрэл ярилаа. Тэрбээр цааш нь ярихдаа “Монголын эмэгтэйчүүдийн холбооны хувьд 2019 оныг хүчирхийллийн эсрэг жил болгон ажиллаж байна. “Өрх толгойлсон, өрөөсгөл гэр бүл”, “өрх толгойлсон хүүхэд”, “тавиул хүүхэд” гэсэн нэр томьёо нийгэмд хэрэглэгдэх болжээ. Өнөөдрийн нийгэмд үүсээд буй нөхцөл байдалд өрх толгойлсон эхчүүд, бага насны охидын бэлгийн хүчирхийлэл гэх мэт хурц асуудлууд гарч буйг та бүхэн харж байгаа байх. Эдгээр асуудлуудыг бидний одоогийн мөрдөж буй Гэр бүлийн тухай хууль зохицуулдаг. Гэвч тус хууль нь 1999 онд батлагдсан ба 2006 оноос хойш хуулийн шинэчилсэн найруулгын төсөл дээр зургаан удаа ажлын хэсэг байгуулагдаж, хоёр удаа УИХ-д өргөн баригдсан ч улс төрийн шалтгаанаар дэмжигдээгүй байдаг. Тийм учраас энэ удаагийн хаврын чуулганаар Гэр бүлийн тухай хуулийг улс төржүүлэлгүйгээр хэлэлцэж, батлахыг шаардаж байна” гэлээ.