УИХ-ын гишүүд тойргийнхоо иргэдтэй уулзах үеэрээ эд бараа тараадаг, сонгуулиар саналыг нь худалдаж авдаг “гаж” үзэгдлийг Үндсэн хуулийн нэмэлт өөрчлөлтөөр хална. Монгол Улсын Үндсэн хуульд оруулах нэмэлт, өөрчлөлтийн төсөлтэй холбогдуулан Ерөнхийлөгч Х.Баттулга тусгайлсан саналаа долдугаар сарын 16-ны өдөр Улсын Их Хуралд өргөн мэдүүлэхдээ энэ саналыг тусгасан юм.

Ялангуяа орон нутгаас сонгогдсон гишүүд Цагаан сараар хөдөөгийн малчин иргэдэд өөрийнхөө зурагтай данх, шанага, бедон сав, аяга, халуун сав зэргийг өгдөг. Хичээлийн шинэ жил эхлэхтэй зэрэгцээд тойргийнхоо өнчин ядуу хүүхдүүдэд халуун гараа сунгаж буй хүн болж жүжиглэн цүнх, дэвтэр ном бэлэглэдэг. Тун удахгүй гишүүд цүнх, бал, дэвтэр тараадаг давлагаагаа эрчимтэй үргэлжлүүлнэ. Өмнөх парламентын үед Баянхонгор аймгаас сонгогдсон Д.Ганбат гишүүн сонгогчдодоо 40-ийн бедон тарааж байв. Зүгээр ч өгчихгүй дээр нь өөрсдийнхөө нэр, зураг дүрсийг хэвлүүлсэн гэж байгаа. Нийгмийн сүлжээгээр ил болж, олон түмний доог тохуу болсон нь энэ хэд байх. Тэднээс гадна олон гишүүн тойргийнхоо иргэдэд өөрсдийнхөө хөрөгтэй жааз, хуанли, цэвэр ус гээд элдэв юм өгдөг.

Тэр ч бүү хэл энэ жилийн сар шинийн баяраар Баянгол дүүргийн МАН-ын хороон дарга, УИХ-ын гишүүн “Оргил”ын гэх тодотголтой Ж.Ганбаатар ахмадуудад бэлэг тарааж 83 настай иргэний аминд хүрсэн гэдгийг хэн хүнгүй мартаагүй байх. Энэ мэт эмгэнэлтэй, ард түмнээ дорд үзсэн бэлэг тараах үйл ажиллагааг 2020 оны сонгууль эхлэхээс өмнө таслан зогсоох зайлшгүй шаардлагатай.

Яагаад УИХ-ын гишүүд сонгогчдодоо янз бүрийн зүйл тараадаг юм бэ гэвэл тэдний энэ үйлдлийг Монгол Улсын хуулиар хориглоогүй гэж хуульчид тайлбарладаг. Уг нь УИХ-ын гишүүдийг цүнх ном хүүхдүүдэд тараах биш аав, ээжийг нь санхүүгийн чадамжтай, ажилтай орлоготой болгоно гэж амлаж гарч ирсэн хүмүүс. Гэтэл эрхэм төрийн түшээд маань улс орныхоо эдийн засгийг сайжруулж, ард түмнээ ажилтай орлоготой, гэдэс цатгалан, мөр бүтэн явуулна гэсэн амлалтаа буруу аргаар биелүүлдэг нь үнэн. Тэд энэ суудалдаа удаан тогтох гэж баруун солгойгүй бэлэг сэлт тарааж байгаа үйлдлээ “Хууль зөрчөөгүй” гэж хэлэх байх. Тиймээс гишүүдийн энэ зүй бус үйлдлийг Үндсэн хуулиар хориглох нь зүйтэй юм.