Хөвчийн Жонон бэйс Сангилдоржоос 1893 онд VII Богд Жавзандамба хутагтын 25 насны сүүдэр тохиосонд зориулан нутаг хошууныхаа уран үйлтнүүдээр урлуулсан өвч бүрэн тавилгатай, бага таван ханатын 150 ирвэсийн арьсаар бүрсэн тугдам буюу номын өргөөг өргөн барьжээ.

Энэхүү ирвэсийн арьсан гэр нь он цагийн эрхээр ихээхэн хуучирч, сэргээн засварлах шаардлагатай болсон байж. АНУ-ын Элчин сайдын соёлын өвийг хамгаалах сангийн Жижиг төслийн уралдаанд Монгол Улсаас шалгарсан АНУ-ын төрийн департаментын дэргэдэх Боловсрол, соёлын асуудал хариуцсан товчооны Соёлын өвийн төвийн санхүүжилтээр 2018-2019 онд Монгол Улсын Соёлын өвийн үндэсний төвийн мэргэжилтнүүд сэргээн засварлаж дууссан байна.

Жонон бэйсийн хошуу нь Халх даяар алдартай үзэсгэлэнтэй сайхан уул, ус нь жигдэрсэн хамгийн баян нутаг байсан аж. Нутаг хошууныхаа шилдэг урчуудаар бүтээлгэсэн гоёмсог өвч бүрэн тавилгатай багана таван ханатай гэрийн бүрээсэнд дэлхийн таван тивээс авчирсан 150 ирвэсийн арьс орсон хааны эрх ямбын зэрэгцэлд таацсан бэлэг байсан гэдэг.

Гэрийн хаалга, тооно, унийг үндэсний хээ зүмбэрлэж чимсэн ба тавилга, бурхан тахил, эд хэрэглэл бүгд мөнгөөр урласан уран хийцтэй аж.

Монголд төдийгүй орон орны ирвэс нутагладаг бүс нутгийн арьс орсон нь гэрийн оёдол зүйдлээс харагддаг байна. Бага таван ханатай бүтэн сийлбэртэй, мөнгөн тоноглолтой нарийн сайхан хийцтэй энэ гэрийг бороо хур холдсон хуурай, сэрүүн улиралд барьж Богд гэгээн арав хоногийн турш нямба бясалгал үйлддэг байжээ.