Нийслэлийн прокурорын газраас 2020 оны нэгдүгээр улиралд 110 хэрэгт яллах дүгнэлт үйлдэж шүүхэд шилжүүлсэн. Үүнээс Эрүүгийн хуулийн тусгай ангийн 22 дугаар бүлэгт заасан “Авлигын гэмт хэрэг” 25, Эрүүгийн хуулийн тусгай ангийн 20.7 дугаар зүйлд заасан “Мансууруулах эм, сэтгэцэд нөлөөт бодисыг хууль бусаар ашигласан" гэмт хэрэг 55-ыг тус тус яллах дүгнэлт үйлдэж, шүүхэд шилжүүлжээ.

Прокуророос шүүх рүү шилжүүлсэн авлига албан тушаалтай холбоотой хэргүүдийг тоймлон хүргэж байна.

УИХ-ЫН ГИШҮҮН Д.ДАМБА-ОЧИР, Г.СОЛТАН НАРТ ХОЛБОГДОХ ХЭРЭГТ ЯЛЛАХ ДҮГНЭЛТ ҮЙЛДЖЭЭ

УИХ-ын гишүүн Д.Дамба-Очир, Г.Солтан нарт холбогдох эрх мэдэл, албан тушаалын байдлаа урвуулан, ЖДҮХС-гаас хууль бусаар зээл олгож, бусдад болон өөртөө давуу байдал бий болгосон хэрэгт яллах дүгнэлт үйлджээ. Одоогийн байдлаар мөрдөн байцаалтын ажиллагаа дуусч, прокурорт хянуулахаар ирүүлээд байгаа аж.

ЖДҮХС-ийн зээлтэй холбоотойгоор 2019 оны нэгдүгээр сард УИХ-ын гишүүн Г.Солтан, Д.Дамба-Очир, Б.Ундармаа, Л.Энхболд нарын бүрэн эрхийг түдгэлзүүлэх саналыг хүргүүлж байсан ч чуулганаар түдгэлзүүлэх шаардлагагүй хэмээн шийдвэрлэж байсан.

УИХ-ын гишүүдтэй холбоотой хэргийн явцад дуудан ирэх, хянан шийдвэрлэх ажиллагаанд дуудсан хугацаанд нь ирүүлэхийн тулд хуульд заасан бүхий л арга хэмжээг авч байгаа боловч хүндрэл учирч байгааг НПГ-аас мэдээлсэн. Тиймээс цаашид бүхий л арга хэмжээг авч ажиллана гэв. Гэхдээ одоогийн байдлаар дээрх дөрвөн гишүүний бүрэн эрхийг түдгэлзүүлэх санал гаргаагүй, тэр талаар яригдаагүй байгаа юм байна.

Б.ГАРАМГАЙБААТАР, Н.БАТБАЯР НАРЫН ХЭРГИЙГ СЭРГЭЭН ШАЛГАХААР БОЛЛОО

Хөөн хэлэлцэх хугацаа дууссан гэх үндэслэлээр хаагдсан нийт зургаан хэргийг сэргээн шалгах болсон талаар Нийслэлийн прокурорын газрын ерөнхий прокурорын орлогч Ц.Насанбат мэдээлсэн.

Эрүүгийн шинэ хууль хэрэгжиж эхэлснээр Улсын прокурорын ерөнхий газраас 2017-2020 оны нэгдүгээр сарын 20-ны хооронд хөөн хэлэлцэх хугацаагаар хэрэгсэхгүй болгосон хэргүүдийн судалгааг гаргажээ. Нийт 12 хэрэг байснаас 6 хэргийг прокуророос сэргээж, дахин шалгаж эхэлжээ. Эдгээр зургаан хэргийн дотор УИХ-ын гишүүн асан Б.Гарамгайбаатар, Н.Батбаяр нарын “Чингис”, “Самурай” бондын олголт, зарцуулалттай холбогдуулан албаны эрх мэдлээ хэтрүүлсэн, төсвийн хөрөнгийг үрэгдүүлсэн гэх хэрэг багтсан байна. Эдийн засгийн хөгжлийн сайд асан Н.Батбаярыг Б.Гарамгайбаатарын хамаарал бүхий “Монроуд” компанид авто замыг барих тендерийг эрх мэдлээ хэтрүүлэн өгсөн, энэ шийдвэрт таныг нөлөөлсөн гэж буруутгаж байгаа.

МОНГОЛБАНКНЫ ЕРӨНХИЙЛӨГЧ АСАН Н.ЗОЛЖАРГАЛ ХОЛБОГДОХ ХЭРГИЙГ ШҮҮХЭД ШИЛЖҮҮЛЖЭЭ

Монголбанкны ерөнхийлөгчөөр ажиллаж байсан Н.Золжаргалын үндэслэлгүй хөрөнгөжсөн байж болзошгүй хэргийг НПГ-аас яллах дүгнэлт үйлдэн Сүхбаатар дүүргийн Эрүүгийн хэргийн анхан шатны шүүхэд шилжүүлжээ.

Хэргийн эргэн сануулахад, төрсөн ах Н.Жаргалсайхан болон түүний хүү, охины нэрээр 2013-2016 онд Австри улс руу мөнгө шилжүүлж, тэр гуйвуулсан 650 мянган ам.долларыг эхнэр нь хүлээн авч, тус улсад үл хөдлөх хөрөнгө худалдан авсан хэрэгт холбогдоод буй билээ. Австрийн прокурорын газраас шүүхийнхээ зөвшөөрлөөр гаргаж, Монгол Улсад ирүүлсэн баримтад уг байшинг ямар үнээр хэн худалдаж авсныг тодорхойлж, улмаар хөрөнгө царцаах ажиллагаа хийсэн аж.

ЗАМ ТЭЭВРИЙН ЯАМНЫ САЙДААР АЖИЛЛАЖ БАЙСАН Д.ГАНБАТ, ЯАМНЫ ГАЗРЫН ДАРГА Д.ДОРЖХАНДЫН ХЭРГИЙГ ШҮҮХ РҮҮ ШИЛЖҮҮЛЭВ

Зам тээврийн яамны сайдаар ажиллаж байсан Д.Ганбат, яамны газрын дарга Д.Доржханд нарын эрх мэдэл, албан тушаалын байдлаа урвуулсан, хахууль авсан хэргүүдийг 2020 оны гуравдугаар сарын 31-ний өдөр яллах дүгнэлт үйлдэж, Сүхбаатар дүүргийн Эрүүгийн хэргийн анхан шатны шүүхэд шилжүүлжээ.

Хэргийн сануулахад, АТГ-аас Зам тээвэр хөгжлийн яамны Авто замын бодлогын хэрэгжилтийг зохицуулах газрын дарга Д.Доржхандыг Эрүүгийн хуулийн 22.1 дүгээр зүйл Эрх мэдэл, албан тушаалын байдлаа урвуулан ашигласан гэх зүйл ангиар буюу авто замын компаниудын дунд тендер зарлахдаа бусдад давуу эрх олгож, авлига авсан байж болзошгүй үндэслэлээр шалгаж байгаа.