Нэг, хоёр өдрийн үргэлжилсэн бороонд Улаанбаатар хот тэр чигтээ урсчих шахлаа. Гэр хорооллын хашаа давж халин хотын гудмаар хөрс, шороо хог новш бүгдийг хуу хаман үерлэв. Юунаас болов? Товчхондоо нийслэл хотод ус зайлуулах инженерийн шийдэл, шугам хоолой байхгүйг нотолжээ.

Дөрвөн уулын дунд байрлалтай учир уулын хүчтэй үер буухыг урьдчилан тооцсон суваг, шуудуу далан байх ёстой. Гэтэл зөвшөөрөлгүй баригдсан барилга, зам, байгууламж үерийн ус урсах нөхцөлийг хааж ийнхүү хурын их ус хаа сайгүй нэлдээ буух аюул нүүрлэв. Өчигдөр, уржигдар орсон борооны улмаас Чингэлтэй дүүргийн нутаг дэвсгэрээс Хан-Уул дүүргийн нутаг дэвсгэр хүртэл үерийн аюултай нөхцөл байдал үүсжээ.

Хотын захиргаанаас түгжрэлийн асуудлыг цогцоор нь шийднэ хэмээн мэдэгдэж, төсөвт өртгийг тооцуулан, өрөмдлөгийг хүртэл хийж эхэлнэ хэмээгээд буй.Өөрөөр хэлбэл энэ 6 сараас метроны шугам, өрөмдлөг эхэлнэ гэгдээд байв. Гэвч өчигдөр буюу 6 сарын 21-ний өдөр хотын дарга Х.Нямбаатар “Хан-Уул дүүргийн Хүннү-2222 хорооллын орчим усанд автсан нь тэр хавьд байдаг ус зайлуулах насос эвдэрсэнтэй холбоотой байна.

СӨХ өөрсдөө ийм асуудлаа хариуцаж чадахгүй бол хот аваад явъя...” гэх зэргээр ярив. Гэтэл иргэдийн бичсэн сэтгэгдэлд “Хот ийм асуудал яриад зогсож байх бус бодлогоор асуудлуудыг зохицуулах үүрэгтэй. Хотын дарга СӨХ-ны ажлыг хийгээд байж болохгүй” хэмээн шүүмжилжээ.

Хотын дарга 2024 оны 2 сард “ Метроны тендерийн нийт төсөвт өртөг болох 181.9 тэрбумын нэг төгрөг бүрд хяналт тавьж, өртөг зардлыг бага байхаар тооцож ажиллана” гэж мэдэгдсэн юм. Ус зайлуулах шийдэлгүй хотод метро барих боломжгүй аж.