ШӨХТГ-аас цаг үеийн асуудлаар мэдээлэл хийлээ. Шударга өрсөлдөөн, хэрэглэгчийн төлөө газар нь 2018 онд 71 арга хэмжээ төлөвлөж, 92 хувийн биелэлттэй ажилласан байна. Мөн “Хэрэглэгчийн мэдээллийн төв” байгуулагдсанаас хойш хэрэглэгчийн лавлах 1800-1284 дугаарын утсанд нийтдээ 4443 иргэн ханджээ. Үүнээс зөвлөгөө зөвлөмж хүссэн 2846 иргэн, асуулт санал лавлагаа хүссэн 790 иргэн, өргөдөл гомдол гаргасан 807 иргэн хандсан байна.

Салбарын хувьд барилга, ОСНААҮ, СӨХ-тэй холбоотой гомдол мэдээлэл 2017 онд 31.6 хувь байсан бол 2018 онд 25 хувь болжээ. Харин боловсрол, эрүүл мэндийн салбарын гомдол, мэдээлэл 2017 онд 3.7 байсан бол 2018 онд 5.5 хувь, нефть, шатахуунтай холбоотой гомдол 2018 онд 9.3 хувь болж өссөн үзүүлэлттэй байна. ШӨХТГ-аас өргөдөл гомдлын хуудсыг томоохон супермаркет, аж ахуй нэгжүүдэд хүргүүлжээ. Тэд хэрэглэгчийн өргөдлийг хүлээн авч, хуулийн хугацаанд шийдвэрлэх юм.

Өрсөлдөөний тухай хуулийн хүрээнд 2018 онд 1.8 тэрбум төгрөгийн торгууль шийтгэл тавьжээ. Тодруулбал, хэрэглэгчийн эрхийг хамгаалах хуулийн хүрээнд 95.6 сая төгрөгийн торгууль, зар сурталчилгааны тухай хуулийн хүрээнд 27 сая төгрөгийн торгууль, Зөрчлийн тухай хуулийн хүрээнд 4.5 сая төгрөгийн торгууль ноогдуулан ажилласан байна. ШӨХТГ-аас 2019 оныг “Хариуцлагатай хэрэглээ-хэрэглэгчийн эрх”-ийн жил болгон зарласан байна. Тус агентлаг нь таван зорилтын хүрээнд 84 арга хэмжээг хэрэгжүүлж ажиллахаар зорьж байгаа гэв. Тухайлбал,

Хууль эрх зүйн орчинг боловсронгуй болгох. Өрсөлдөөний тухай хууль, Хэрэглэгчийн эрхийг хамгаалах тухай хууль, Зар сурталчилгааны тухай хуулиудын шинэчилсэн найруулгын төслийг Монгол Улсын Засгийн газар, Улсын Их хуралд өргөн барьж батлуулах

2019 онд “Хариуцлагатай хэрэглээ-Хэрэглэгчийн эрх” жил болгон зарлаж, холбогдох арга хэмжээг авах

Зүүн Азийн Өрсөлдөөний байгууллагуудын удирдлагуудын дээд хэмжээний уулзалтыг Улаанбаатар зохион байгуулах

Орон нутгийн хэрэглэгчийн эрхийг хамгаалах гомдол саналыг шуурхай шийдвэрлэхэд анхаарч салбар зөвлөл, улсын байцаагчдын үйл ажиллагааг дэмжих, орон нутагт ажиллах

Шатахуун импортлогч нартай холбоотой асуудлыг шийдвэрлэхийн тулд хууль эрх зүйн орчноо сайжруулах, шатахууныг шинжилдэг лабораторийг сайжруулахгүй бол энэ асуудал шийдэгдэхгүй. Евро-5 стандартын шатахуун, дизель хэрэглэдэг автомашиныг гадаадаас импортолдог ч гэсэн монголд зарагддаг шатахуун нь шаардлага хангадаггүй. Тиймээс ШӨХТГ-аас үе шаттай шуурхай арга хэмжээ авмаар байгаа боловч хууль эрхзүй орчин нь хангалтгүй байна. Шатахуун импортлогч нар евро-2 стандартын шатахуун импортоор оруулж ирсний улмаас хэрэглэгчид хохирч байна.