-ӨДРИЙН ЦАГТ НАРНЫ ГЭРЛЭЭС ДУЛААНАА ХАНГАЛТТАЙ ХУРИМТЛУУЛДАГ-

Хөвсгөл аймгийн Бүрэнтогтох сумын Туяа багийн нутагт байрлах “Харганат” гэх амралтын газрын хамт олон яндангүй, цахилгаан халаалтгүй зөвхөн нарны (байгалийн) дулаанаар халдаг хоёр давхар байшинг барьж ашиглалтад оруулсан байна. Уг амралтын газар очиж амарсан дотоодын жуулчдын ярьж байгаагаар гадаа -30 хэмийн хүйтэн байхад байшин доторх агаарын дулаан +20 хэмийг зааж байсан аж.

Сүүлийн үед ОХУ-д монгол түмний уламжлалт гэр шиг хэлбэртэй, нарын илчээр халаалтаа шийддэг ийм байшинг ихээр барьдаг болжээ. Уг барилгыг “Купольный дом” гэж нэрлэх бөгөөд байгаль экологид ээлтэй, эдийн засагт хэмнэлттэй, зай талбай ихтэй, гоёмсог дизайнтай, бат бөх, удаан эдэлгээтэй учраас олон хүмүүсийн анхаарлыг татдаг байна. Ийм гэр хэлбэртэй байшинг Эрхүүгийн оросууд 1,5-2 сарын дотор барьж гүйцэтгэдэг аж.

Бид “Харганат” амралтын газрын захирал Б.Бат-Эрдэнтэй утсаар холбогдож ЭКО хаусных нь талаар мэдээлэл авсан юм.

-ХОЁР ДАВХАР ЭКО ХАУСЫГ БАРИХАД НИЙТ 100 ОРЧИМ САЯ
ТӨГРӨГ ЗАРЦУУЛСАН-

-Эко хаусны зураг төслийг хаана хийлгэсэн бэ. Хэдий хэр хугацаанд барьж ашиглалтад оруулав?

-Зөвхөн нарны элчээр халаалтаа шийдсэн хоёр давхар эко хаусны зураг төслийг Франц улсаас ирсэн мэргэжилтэн хийж өгсөн. Харин барилгын ажлыг бид өөрсдөө хоёр жилийн хугацаанд аажуу тайван хийж гүйцэтгэн өнгөрсөн онд ашиглалтад оруулсан. Энэ байгууламжийн хоёр давхарт иогийн заал, нэг давхарт нь саун, душ, массаж, ариун цэврийн өрөө гэх зүйлс байрладаг байна. Газар дор нь ус цэвэршүүлэх байгууламж хийсэн байгаа.

-Та бүхэн байшингийнхаа дулааныг зөвхөн нарны элчээр хангахын тулд ямар технологи ашигласан бэ?

-Сүүлийн өдрүүдэд цаг агаар тогтуун сайхан, гадаа дулаахан байгаа болохоор байшиндаа агаарын сэлгэлт хийхгүй бол хүн тогтож суухын аргагүй халуун байна. 12, 1, 2 саруудад шөнө их хүйтэн хоновол цагаар жаахан нэмэлт дулаан өгөхгүй бол сэрүүвтэр хоночих гээд байдаг юм. Гэхдээ өдөр бүр биш л дээ. Энэ өвөл тоотой хэдхэн өдөр л нэмэлт дулаан өгсөн. Одоо бол зөвхөн нарны илчээр байшингаа халааж байна. Өдрийн цагт дулаанаа хангалттай авдаг юмаа. Байшингийнхаа урд шилийг вакум цонхонд ашигладаг шилээр хийгээгүй, хүнддэг юм. Тусгай циллодон гурван давхар шилээр хийсэн. Байгалийн гэрлийг ашиглаж өдрийн цагт дулаанаа хуримтлуулдаг байшин шөнө дулаанаа алдахгүй байх нь их чухал байдаг л даа. Тиймээс байшингаа маш сайн дулаалах хэрэгтэй.

-Дулаан алдалт багатай байшин барихын тулд юуг анхаарах ёстой вэ. Та туршлагаасаа хуваалцахгүй юу?

-Ер нь манай монголчууд байшин барилга барихдаа дулаалж мэддэггүй. Саяхнаас л ярьж эхэлж байна. Цонхны шил гурван давхар байх ёстойг хоёр давхар хийдэг. Аливаа барилга байгууламж дулаан алдахгүй л байвал нарны илчээр халаалтыг нь шийдэж болно. Хамгийн гол нь дулаан агаараа гадагш нь алдахгүй бол дотроо байж л байдаг. Нарны илчээр байшингаа халаана гээд хэтэрхий урд хэсэгтээ хэтэрхий том цонхтой хийж болохгүй. Харин ч эсрэгээрээ их сэрүүхэн болно. Тооцоо судалгаа хийх нь чухал. Мөн цонх хийхдээ нимгэхэн шил ашиглабал нэмэргүй. Дулаанаа шөнөдөө гадагш нь алдана. Дулаан алдагдалгүй байшин барихын тулд суурь, хана, таазаа маш сайн дулаалж өгөх хэрэгтэй.

-Та энэ технологиороо жуулчны бааз дээрээ ахиад байшин барих уу. Эко хаусны ашигтай талбай нь хэдэн метр квадрат вэ?

-Ирээдүйд барих төлөвлөгөөтэй байгаа. Эко хаусны нийт ашигтай талбай нь 200 гаруй метр квадрат, 10 метр орчим өндөр. Зурган дээрээс харахад жижигхэн гэр шиг харагдаж магадгүй л дээ. Бодитоор нь харвал их том байгууламж байгаа юмаа.

-Уучлаарай, нууц биш бол эко хаусыг барихад хичнээн төгрөгийн санхүүжилт зарцуулсан бэ?

-Энэ эко хаусыг барихын тулд нийт 100 орчим сая төгрөг зарцуулсан.