-ЖАГСААЛЫН ҮР ДҮНД 200 ГАРУЙ ЖОЛООЧ ЭРХЭЭ ХАМГААЛЖ ҮЛДЛЭЭ-

Өнөөдөр 11.00 цагаас эхлэн Төрийн ордны баруун хаалганы гадна Тээвэрчдийн холбооныхон жагсаал зохион байгууллаа.

Учир нь Хөвсгөл чиглэлд орон нутгийн тээврийн үйлчилгээ үзүүлдэг хоёр компанийн үндсэн 80 жолооч байдаг. Мөн ээлжийн жолоочтойгоо нийлээд 200 гаруй ажилтан байдаг аж. Гэтэл дээрх жолоочдоос зөвшөөрөл авалгүйгээр гэрээгээ шууд утгаар нь зөрчиж АТҮТ-ийн удирдлагууд дээрх чиглэлд дахин өөр компанид тээврийн үйлчилгээ үзүүлэх зөвшөөрлийг олгосон байна. Энэ шийдвэр нь анхлан байгуулсан гэрээг зөрчсөн бөгөөд нийтдээ 200 гаруй жолоочийг ажилгүй болгосон аж.

Энэхүү шийдвэрийг Хөвсгөл чиглэлд зорчигч тээврийн үйлчилгээ үзүүлдэг компанийн жолооч нар эсэргүүцэн өнөөдөр жагсаж байна. Өмнө нь эрхээ зөрчүүлж, ажилгүй болсон жолооч нар АТҮТ болон ЗТХЯ-ны удирдлагуудад асуудлаа хэлж зөвшилцөх санал гаргасан ч хүлээж аваагүй тул ийнхүү жагсаж буй юм. Тэд өчигдөр энэ асуудлаар Ерөнхий сайд У.Хүрэлсүхэд яаралтай уулзах хүсэлт гаргасан байна. Өнөөдөр хүсэлтийнхээ хариуг авахаар цуглажээ.

Биднийг 12.00 цагийн орчимд сурвалжлахаар очих үеэр жолооч нарын хүсэлтийг хэлэлцэж байгаа гэх мэдээлэл өгсөн билээ. Удалгүй ерөнхий сайдын ажлын албанаас жолооч нарын асуудлыг хэлэлцээд нэмэлтээр орсон компанийн эрхийг түдгэлзүүлэх шийдвэр гаргасан тухайгаа хэллээ. Ингэснээр 200 гаруй жолооч нар ажлын байраа хадгалж үлдэж байгаа бөгөөд АТҮТ-өөс Хөвсгөл чиглэлд нэмэлтээр тээврийн үйлчилгээ үзүүлэхээр гаргасан компанийн эрхийг цуцалсан байна.

Улсаа аврах ард түмний хөдөлгөөний ерөнхий зохицуулагч Б.Жагараас тодрууллаа.

-Сайн байна уу. Өнөөдрийн жагсаалын тухай мэдээлэл өгөхгүй юу. Таньд Тээвэрчдийн холбооныхон хандан тэмцэж хүссэн гэсэн?

-2019 оны 2 сарын 18-ний өдөр Монголын нийт тээвэрчдийн эрх ашгийг хамгаалан ажилладаг Тээвэрчдийн холбооныхон эрх ашгаа хамгаалуулах гэж хүсэлт өгсөн. Энэ хүсэлтийг уг нь бол Засгийн газар юм уу, Засгийн газрын шийдвэрийг хэрэгжүүлэгч байгууллагууд хэрэгжүүлэх ёстой. Гэтэл өнөөдөр дээрх байгууллагууд ажлаа хийхгүй байгаагаас болоод Иргэний нийгмийн байгууллагад иргэд олон мянгаанаар хандаж байна. Тэгэхээр бид нар Төрийн тодорхой чиг үүргийг гүйцэтгэж байна гэж ойлгож болно. Өнөөдөр ЖДҮ-чин хулгайч нар шударга ёс яриад байна. Нэг нэгэндээ хариуцлага тооцож чадахгүй болохоороо нийгмийн уур амьсгалыг өөрчилж байна. Орон нутгийн жолооч нарын аж амьдралыг МАНАН бүлгийнхэн хулгай хийж байна. Тэгэхээр МАНАН бүлэглэн юу вэ? гэхээр АТҮТ-ийн дарга н.Дэлгэрнаран гэж хүн МАНАН бүлгийн үед томилогдсон. АСЕМ-аар ашиглагдсан үнэтэй автобуснуудыг хэрэглэхгүй болохоор нь энэ жолооч нарт шахсан. Өгөхдөө ажлын байрыг тань тогтвортой хадгална. Гэрээнд ямар нэгэн өөрчлөлт орохоор бол та нартай зөвшилцөнө гэж өндөр үнэтэй автобуснуудаа шахчихаад одоо ажилгүй болгож байна.

Гэтэл энэ жолооч нар сард таван сая төгрөгийн банкны хүү төлөөд явж байна. Тэгэхээр энэ эрх ашгийг зөрчөөд ажлын байрыг нь үгүй хийж байгаад харамсаж байна.

АТҮТ болон ЗТХЯ-ны удирдлагуудтай нийтийн тээвэрт үйлчилгээ үзүүлж байгаа мэргэшсэн жолооч нарын эрх ашгийн битгий зөрчөөд байна гэдгийг хэлж уулзах хүсэлт хүргүүлсэн. Мөн ерөнхий сайдад дээрх жолооч нарын ажлын байрыг хадгалж эрхийг нь хамгаалахыг хүссэн юм. Ерөнхий сайдын ажлын албанаас хариу өгсөн. Хариунд энэ хууль бусаар нэмэгдсэн компаний эрхийг цуцалахаар болсон гэдгээ хэллээ.