Шагдардах, Мянганбаярдах, Түвшинжаргалдав аа гэж фэйсбүүкээр иргэд эгдүүцлээ илэрхийлэх болжээ. Арга ч үгүй биз.

Хувийн жаргалаас дорд үзэгддэг гэр бүлийн амьдрал бий болоод удлаа. Өөрсдөө өчнөөн саяын үнэтэй том тэрэг унаж, зайсанд амьдраад л хүний сайхан үрийг ханилан сууна, хайрлана гэж дагаж давхиад хүүхэдтэй болгоод хөсөр хаядаг эрчүүд хог нэгээрээ л байна.

Өчигдөр гэхэд дуучин Нара хүүгийнхээ эцэгтэй ДНК шинжилгээ өгч байгаагаа фэйсбүүкт нийтэлж байна. Яасан өрөвдмөөр юм бэ. Төрүүлсэн хүүхдэдээ сарын 90 мянган төгрөг өгөх дээр том компанийн захирал татганаж байна. Бараг л миний хүүхэд биш байгаасай гэж залбирч суугаа биз. Өмнөөс нь ичмээр энэ үйлдэл бол өнөөх Шагдаруудын төлөөлөл мөнөөсөө мөн.

Шагдаруудад чанга хууль хэрэгтэй байна. Одоогийн хуулиар Шагдарууд хүүхдийн тэтгэмжийг амьжиргааны доод түвшин буюу 90-100 төгрөг төлнө гэж тогтоолгодог. Эмгэнэлтэй энэ 100 мянган төгрөг нь хүүхдийн хэрэгцээнд бодит байдалд хүрэлцээгүй. Хүүхдийн тэтгэмжийн асуудал манай улсад л ийм арчаагүй байдалд байна. Саяхнаас УИХ-ын гишүүн Н.Учрал гэр бүлийн тухай хуульд нэмэлт өөрчлөлт оруулж хүүхдийн тэтгэмжийг нэмэгдүүлж эцэг, эхийн хариуцлагыг чангатгах талаар байр сууриа илэрхийлсэн. Түүнчлэн өөрийн фэйсбүүк хуудсаар дамжуулж хуульд оруулах саналаа аваад эхэлжээ.

Түүний гэр бүлийн хуульд хийх гол өөрчлөлт нь салсны дараа тогтоогддог хүүхдийн тэтгэмжийг амьжиргааны доод түвшингээр биш эцэг, эхийн орлогоос хамаарч тогтоодог болгох заалт юм. Нэг үгээр баян Мянганбаяр ч хүүхдэдээ хууль нь энэ гээд 100 мянга өгдөг бус хэд олж байгаагаас хамаарч хүүхдийн тооноос хамаарч 15, 20, 25 хувийг хүүхдэд шууд олгох ёстой гэж хуульчлан гэв.

Энэ хууль бодит амьдралд хэрэгжвэл одоогийн хуулиас хэд дахин зөв зохицуулалт болж өгөх юм. 3 сая төгрөгийн цалинтай Болд 1 хүүхэдтэй бол сард 450,000 өгөх юм. Гэтэл одоогийн хуулиар 100,000 төгрөг өгч байгаа. Хууль гарснаар хүүхдээ тэжээн тэтгэх хариуцлага гээч ойлголт зарим нэг хүний тархи руу орж хүүхэдтэй болох талаар бодож төлөвлөдөг болох биз. Шагдаруудыг сайн хууль л багасгана.