Хилээр түргэн муудах хүнсний бүтээгдэхүүн оруулж ирдэг аж ахуйн нэгжүүдэд зөвшөөрөл өгөхдөө "хясан боогдуулах" замаар ТЭРБУМ шахуу төгрөгийн авлигал авсан нь мөрдөн байцаалтаар тогтоогдсон Мэргэжлийн хяналтын Ерөнхий газрын Экспорт, импорт, хорио цээрийн газрын дарга Э.Аззаяа, Н.Баярсайхан тэргүүтэй байцаагч нарын хэргийг шүүхээс хэрэгсэхгүй болгосон. Тодруулбал, “Хөөн хэлэлцэх хугацаа дууссан” гэсэн үндэслэлээр ХЭРЭГСЭХГҮЙ болгосон нь иргэд олон нийтийн шүүхэд итгэх итгэлийг алдагдуулаад байна.

Одоогоос хоёр жил гаруйн өмнө буюу 2017 онд АТГ-аас тусгай ажиллагаа явуулж, МХЕГ-ын Экспорт, Импорт, Хилийн хорио цээрийн хяналтын газрын дарга асан Э.Аззаяа, хэлтсийн дарга Н.Баярсайхан нарын орон гэр, албан тасалгаанаас 230.800.000 төгрөг, 152.177 ам.доллар, 70.000 юань бэлнээр хураан авч байв.

-НИЙСЛЭЛИЙН ПРОКУРОРЫН ГАЗРААС 2-8 ЖИЛ ХОРИХ ЯЛЛАХ ДҮГНЭЛТ ҮЙЛДСЭН Ч, 40 САЯАР ТОРГУУЛАВ-

Уг хэрэгт Нийслэлийн прокурорын газраас "санаатайгаар бүлэглэн зохион байгуулалтайгаар, хясан боогдуулах замаар авлигын гэмт хэрэг үйлдсэн" гэж үзээд 2 -8 жил хорих ял бүхий Эрүүгийн хуулийн 22,4,5-аар яллах дүгнэлт үйлдэж шүүхэд хүргүүлжээ. Гэтэл 2019.05.06-ны өдөр шүүхээс уг хэргийг ХӨӨН ХЭЛЭЛЦЭХ ХУГАЦАА ДУУССАН гэх үндэслэлээр хэрэгсэхгүй болгочихож байгаа юм.

-Шүүгдэгч Н.Баярсайханыг нийтийн албан тушаалтан хахууль авах гэмт хэргийг хясан боогдуулах аргаар үйлдсэн гэмт хэрэг үйлдсэн гэм буруутайд тооцож, ЭХТА-ийн 22.4 дүгээр зүйлийн 5 дахь хэсэгт зааснаар нийтийн албанд ажиллах эрхийг 5 жилийн хугацаагаар хасаж, 40 сая төгрөгөөр торгох ял шийтгэсэн.

-Шүүгдэгч Э.Аззаяа, Г.Элдэв-Очир, С.Бүрэнтөгс нарыг ЭХТА-ийн 18.6 дугаар зүйлийн 1 дэх хэсэгт заасан гэмт хэргийн улмаас олсон мөнгө, орлого гэдгийг мэдсээр байж түүнийг Н.Баярсайханаас авсан гэмт хэрэг үйлдсэн гэм буруутайд тооцож, тус гэмт хэрэг үйлдсэнээс хойш хуульд заасан хөөн хэлэлцэх хугацаа дууссан байх тул хэргийг хэрэгсэхгүй болгож шийдвэрлэсэн. Ингэхдээ Э.Аззаяа, Г.Элдэв-Очир, С.Бүрэнтөгс нарыг ЭРҮҮГИЙН ХУУЛИЙН 18.6 дугаар зүйл "Мөнгө угаах" зүйл ангиар зүйлчилсэн.

-ШИНЭ ЭРҮҮГИЙН ХУУЛИАР “ХӨӨН ХЭЛЭЛЦЭХ ХУГАЦАА”-Г ӨӨРЧЛӨХ САНАЛЫГ 2017 ОНД Ш.РАДНААСЭД ГАРГАЖЭЭ-

Өмнөх Эрүүгийн хуулиар “ХӨӨН ХЭЛЭЛЦЭХ ХУГАЦАА”-г гэмт хэрэг үйлдсэн өдрөөс эхлэн тоолж, Гэмт хэрэгтэн баригдсан өдрөөр дуусгавар болдог байсан. /2012 онд үйлдсэн гэмт хэргийг 2016 онд илрүүллээ гэхэд хөөн хэлэлцэх хугацаа 5 жил дотроо барьсан учраас цааш хэдэн ч жил шалгаж болно /

Шинэ хуулиар “ХӨӨН ХЭЛЭЛЦЭХ ХУГАЦАА”-г гэмт хэрэг үйлдсэн өдрөөс эхлэн анхан шатны шүүхийн шийдвэр хүчин төгөлдөр болсон өдрөөр дуусгавар болдог болгон өөрчилжээ. 2012 онд үйлдсэн гэмт хэргийг 2016 онд илрүүлээд 2018 онд шүүх хурал нь болоход хөөн хэлэлцэх 5 жилийн хугацаа өнгөрсөн байх жишээтэй.

Эл хэрэг УИХ-ын гишүүн Ш.Раднаасэдийг холбоотой байж болзошгүй тухай дуулиан дэгдээд эхэлчихсэн. Э.Аззаяа, Н.Баярсайхан нар авсан авлигын мөнгөө Ш.Раднаасэдэд өгдөг байсан гэх яриа ч гараад буй юм.

2017 онд Засгийн газраас өргөн барьсан шинэ Эрүүгийн хуулийн төсөлд “Хөөн хэлэлцэх хугацаа”-д ямар нэг өөрчлөлт оруулаагүй өргөн барьсан. Гэтэл хуулийг хэлэлцэх явцад Ш.Раднаасэдийн толгойлдог УИХ-ын Хууль зүйн байнгын хорооны хурал дээр гэнэт Улсын дээд шүүхийн шүүгчээр “Хөөн хэлэлцэх хугацааг шүүхийн шийдвэр гартал болгон хойшлуулах” санал хэлүүлж, түүнийг нь гишүүдээр дэмжүүлсэн гэгдэж буй. Ингэхдээ дэгийн хууль зөрчим, амаар санал гаргаад л баталчихсан байна.

2017.04.25-ны Хууль зүйн байнгын хорооны хуралдаанаар Эрүүгийн хэрэг хянан шийдвэрлэх тухай хуулийг шинэчлэн найруулах төслийн анхны хэлэлцүүлэг хийсэн нь олон нийтэд ил болоод байна. Тухайн үед хөөн хэлэлцэх хугацааг өөрчлөхийн төлөө хэн хамгийн их улайрч байгаа нь тодорхой харагдаж байгаа юм.

Мэргэжлийн хяналтын байцаагчдын хэрэг 2017 оноос эхлээд хоёр жил шахам прокурор, АТГ дээр гацаж, шүүхээр орж эцэст нь “Хөөн хэлэлцэх хугацаа дуусч“ ийнхүү хэрэгсэхгүй болж байна. Энэ нь түүнийг хардах хамгийн ноцтой үндэслэл болоод байгаа юм.

-Э.АЗЗАЯА, Н.БАЯРСАЙХАН НАР НАДТАЙ ЯМАР Ч ХАМААРАЛГҮЙ, Н.БАЯРСАЙХАН БИД ХОЁР ИХ СУРГУУЛИЙН НЭГ АНГИ-

УИХ-ын гишүүн Ш.Раднаасэд 2014-2015 оны хооронд Мэргэжлийн хяналтын ерөнхий газрын даргаар ажиллаж байсан. Э.Аззаяа нь Ш.Раднаасэдийг Мэргэжлийн хяналтын газрын даргаар ажиллаж байхад түүний удирдлага дор ажиллаж байсан бол Н.Баярсайхан түүнтэй Их сургуулийн нэг анги. Шалгалтын явцад тэднийг Ш.Раднаасэд гишүүнийг илчилвэл амьдралтай нь ярина гэж сүрдүүлсэн ч гэдэг мэдээлэл ч гарч байв.

Харин Ш.Раднаасэд гишүүн сэтгүүлчдийн асуултад, "Би 2015 оны нэгдүгээр сард ажилд орсон. Тэр хүмүүс тэрнээс өмнө, яг л тэр албан тушаал дээрээ ажиллаж байсан. Тэр хүмүүсээсээ лавла. Хувийн харьцаатай зүйл огт байхгүй. Ер нь авлигын хэрэг хариуцлага хамгийн чанга байх ёстой. 2017 оны шинэ эрүүгийн хуулинд хээл хахууль, авлигын хэргийн ялыг маш өндөр тавьсан. Э.Аззаяа, Ц.Баярсайхан яаж мэдүүлснийг би яаж мэдэхэв дээ. Наадахаа тэр хүмүүсээс асуу. Ц.Баярсайхан бид хоёр их сургуулийн нэг анги. Тэр бол үнэн. Саяхан томилогдсон Л.Өлзийсайхан н.Цолмон нар ч манай анги, бид нэг төгсөлтийнхөн" гэсэн билээ.