УИХ-ын гишүүн Г.Тэмүүлэн: Ёс зүйн дэд хорооны хурлаар хэлэлцэх байх. Одоогоор хариуцлага хүлээлгэх хууль эрх зүйн орчин байхгүй. Төрийн албан хаагчийн журам дээр л гарсан. Гэхдээ Төрийн албаны тухай хуульд байхгүй. Ёс зүй ярих ёстой юм уу, үгүй юу гэдгийг УИХ тодорхой болгох ёстой. Хоёр талтай л асуудал. Өөрсдөө хууль эрх зүйн орчныг нь бүрдүүлээгүй байж, нөгөө хүнээсээ хариуцлага нэхэж болохгүй. Нөгөө хүний хувьд тухайн улсын хуулиар зөвшөөрөгдсөн,тухайн газар нь очоод тоглосон байлаа гэхэд бид ярихад хэцүү асуудал байхгүй юу. Нийтээрээ үүнийг хориглоод буруу зөв гэвэл тэр хүнээс хариуцлага нэхэх ёстой. Төрийн албан хаагчийн асуудлыг журмаар зохицуулсан учраас нийтээрээ үүнийг зөвшөөрөхгүй байх хэм хэмжээг ярих ёстой.

Монгол Улсад хуулиар хориглосон байхад нь тэр хүн тоглосон бол буруутай байж болно. Гэхдээ хэм хэмжээ нь хуулийнхаа хүрээнд зөвшөөрөгдсөн газар очоод сонирхоод, судлаад, хараад явсан бол хууль эрх зүйн орчноо тодорхой болгож байж зарчим ярих хэрэгтэй.

“УИХ-ын гишүүд хариуцлагаас гадна үлддэг энэ жишигт үүгээр цэг тавьж, дуусгах ёстой”

ЗГХЭГ-ын дарга Л.Оюун-Эрдэнэ: Хэвлэл мэдээлэл болон иргэддээ баярлалаа гэж хэлмээр байна. Өмнө нь казино тоглох асуудал манайд нэлээд бугширчихсан, УИХ-ын гишүүд, төрийн албан хаагч бараг тоглох ёстой мэт үздэг, Элчин сайдын яамдууд нь хүртэл мэддэг байсан. Харин одоо үүнийг хүлээн зөвшөөрдөггүй нийгмийн уур амьсгалын сэтгэл зүй бүрдэж байгаад миний хувьд туйлын их баяртай байна.Төрийн албан хаагчийн сахилгатай холбоотой асуудлыг удаа дараа ярьдаг Д.Лүндээжанцан гишүүн хүртэл өөрөө холбогдсон асуудал үүслээ. УИХ-ын гишүүний ёс зүйн дүрмийг хуульчлан батлахаас өөр аргагүй болж байгааг нийгмийн сэтгэл зүй харуулж байна. Энэ нөхцөл байдлыг туйлын сайн ойлгосон байх гэж бодож байна. Төрийн албан хаагчид халагдаад байхад үлгэр жишээ байх ёстой. УИХ-ын гишүүд хариуцлагаас гадна үлддэг энэ жишигт үүгээр цэг тавьж, дуусгах ёстой.

Бидний хувьд Засгийн газрын харьяа Цагдаагийн ерөнхий газар, Тагнуулын ерөнхий газрын холбогдох албаны хүмүүст энэ асуудлыг тогтоох үүрэг, чиглэлийг өгсөн. Хэрэв тогтоогдсон тохиолдолд Элчин сайдыг Засгийн газрын хуралдаанаар оруулж, нэн яаралтай эгүүлэн татах арга хэмжээ авна. Цаашид УИХ-ын гишүүдийн бүрэн эрх гэж орхих биш хамтдаа хариуцлага хүлээлгэдэг байх чиглэл рүү сэтгүүлч та бүхнийг Засгийн газартай хамтарч ажиллана гэж бодож байна.

УИХ-ын гишүүн С.Бямбацогт: Хариуцлага хүлээлгэх хуулийн заалт байхгүй биз дээ. Мэдэхгүй байна.

УИХ-ын гишүүн Л.Болд: УИХ-ын гишүүдийн хувьд тодорхой хуулийн зохицуулалт байхгүй олон асуудал байдаг. Гэхдээ ёс зүйн зохицуулалт гэж байна. Үүнийг хэн дүгнэх вэ гэхээр сонгуулиар ард иргэд өөрсдөө шүүн тунгааж, дүгнэх хэрэгтэй. УИХ-ын гишүүдийн авир, араншин ямар байгааг сонгуулиар л дүгнэнэ. Өөр ямар ч аргагүй болчихоод байгаа юм. Үндсэн Хуулийн өөрчлөлтөд УИХ-ын гишүүдийг буцаан татаж болно гэсэн зүйл бий. Гишүүдийг буцаан татах нөхцөлд амлалтаасаа буцаж, ёс зүйгүй асуудал гаргасан тохиолдолд ҮХЦ-ийн дүгнэлт гаргаад бүрэн эрхийг нь түдгэлзүүлдэг байх ийм нэг “сүх”-тэй болохгүй бол утгаа алдаж дууслаа. Төрийн дээд байгууллагадаа ард түмэн итгэхээ больвол энэ өөрөө байж болохгүй зүйл болно. Одоогоор гишүүдийг ажлаас нь чөлөөлөх хуулийн гарц байхгүй.

“Ёс зүйн зөрчил гаргасан төрийн албан хаагчдыг ажлаас нь халдаг бол УИХ-ын гишүүдийг сонгуулиар ард түмэн халдаг”

-Төрийн албан хаагчийн ёс зүйн дүрэмд гадаадад зорчихдоо мөрийтэй /казино/ тоглох, энэ төрлийн газраар үйлчлүүлэхгүй байх тухай дэд заалтыг нэмсэн. “Ороод гарсан” гэдэг нь үйлчлүүлсэн гэдэг ойлголтод хамаарагдахгүй юу?

-Орж болохгүй л гэсэн бол орж болохгүй л байхгүй юу. Ороод гардаг асуудал биш. Нэгэнт төрийн албан хаагчдад шаардлага тавьсан бол УИХ-ын гишүүд автоматаар дагах ёстой. Ёс зүйн зөрчил гаргасан төрийн албан хаагчдыг ажлаас нь халдаг бол УИХ-ын гишүүдийг сонгуулиар ард түмэн халдаг. Ийм л ялгаатай.

-Казиногийн тухай хууль парламентийн босго давдаггүй шалтгаан нь юу юм бол?

- Монголд Казиногийн тухай хууль ярихад арай эрт байгаа юм. Казиног маш том гэмт хэрэг дагалддаг учраас их том эдийн засагтай байдаг. Япон улс ямар том гүрэн билээ тэгэхэд өнөөдөр л казиног зөвшөөрч байна. Монголд зөвшөөрнө, гэхдээ цаг нь болоогүй.

УИХ-ын гишүүн Ж.Бат-Эрдэнэ: Улс төрийн болон төрийн албан хаагчид казинотой холбоотой ёс зүйгүй асуудал гаргахгүй гэж ярьсан. Тэр хэмжээгээрээ асуудал яригдах байх. Казино тоглосон, сонирхсон УИХ-ын гишүүдэд ёс зүйн хариуцлага яригдах ёстой.

УИХ-ын гишүүн Б.Баттөмөр: Төрийн албан хаагчид казино тоглолоо гэдэг мэдээлэл фэйсбүүк, твиттерээр гарч байна. Энэ мэдээллийн хүрээнд л одоохондоо мэдээлэлтэй байна.