Мэдээллийн тэнцвэртэй байх зарчмыг үндэслэн хоёр талын байр суурийг хавсарган хүргэв.

АСУУДАЛ-1: Төр нийгмийн зүтгэлтэн Г.Батхүү агсны хэрэгт УИХ-ын гишүүн Н.Номтойбаяр холбоотой юу?

БАЙР СУУРЬ-1: Талийгаачийн хүү Б.Ганхөлөг болон өмгөөлөгч Ж.Батхуягийн мэдэгдэл

Төр нийгмийн зүтгэлтэн Г.Батхүү агсан өнгөрсөн оны тавдугаар сарын 17-нд Төрийн ордонд таалал төгссөн билээ. Уг хэргийг одоогоор хуулийн байгууллагаас шалгаж байгаа юм. Энэ асуудлаар талийгаачийн гэр бүлийнхэн анх удаа хэвлэлийнхэнд хандаж мэдээлэл хийв.

Өмгөөлөгч Ж.Батхуяг: “Шүүх эмнэлгийн шинжээчдийн багийн дүгнэлт гарсан. Дүгнэлтэд талийгаачийн баруун нүдний чиглэлд хүч үйлчилснээр зовхинд цус хуралт, ухархайн дээд ханын хугарал үүссэн гэж байгаа юм. Хүзүүний зүүн хажууд 7х0.5 сантиметрийн улайлт үүссэн гэсэн байна. Энэ бол боолтын улмаас үүсэж болдог улайлт. Хэвлэл мэдээллээр талийгаачийг өвчний улмаас ухаан алдаж, цус харвасан гэж мэдээлж байсан. Задлан шинжилгээний дүгнэлтээр өвчний улмаас цус харваагүй. Гэмтлийн гаралтай цус харвалт тархинд үүссэн гэсэн дүгнэлт гарсан. Шүүх эмнэлгийн дүгнэлтийн хувьд ийм байна. Дараа нь УИХ-ын нэр бүхий гишүүнээс үнэн худлыг шалгадаг багажаар тест авсан байна. Дүгнэлтээр асуусан асуултад хариулахдаа сэтгэл санааны хувьд гэм буруугийн түгшүүрийн мэдрэмж өндөр гэж гарсан байгаа юм.”

Хүү Г.Ганхөлөг “Найман сарын хугацаанд бид маш тэвчээртэй хүлээж, ажиглаж суулаа. Бид хүндхэн өдрүүдийг туулж байна. Өвөө, эмээ, ээж минь байна. Хамгийн хэцүү нь дөрвөн настай бага дүү маань хоол идэхгүй, ярихгүй хэцүү байдалтай байна. Найман сарын өмнө бидэнд маш том хар толбо үлдээсэн өдөр байлаа. Ийм өдөр болно гэж хэзээ ч төсөөлж байсангүй. Аав маань Төрийн ордонд Ажлын хэсгийн хуралтай гээд явсан. Төрийн тусгай хамгаалалттай газар руу өдрийн цагаар орсон. Буцаж гарч ирээгүй. Өндрөөс унасан л гээд байгаа юм. Энэ бол яалт ч үгүй гаднын нөлөөтэй. Баруун нүд нь хөхөрч хавдсан, хүзүү нь улайсан байдалтай байсан. Зүүн талаараа унасан гэсэн боловч унаагүй талын нүд нь хөхөрч хавдсан байна. Хүзүүний улайлт бол заамдалцсаны шинж шүү дээ. Бид ямар нийгэмд амьдарч байна вэ. Төр нийгмийн зүтгэлтэн, Засгийн газрын гишүүн, УИХ-ын гишүүн хийж байсан хүн Төрийн ордонд нас барлаа” гэв.

БАЙР СУУРЬ-1: УИХ-ын гишүүн Н.Номтойбаяр дээрх мэдэгдэлд дараах тайлбарыг хүргүүлэв

-ЦЕГ-ын дарга С.Баатаржав генералд гомдол гаргасан. Тус гомдолд 2019 оны арваннэгдүгээр сарын 11-ний "Ноцтой мэдээ" сонинд "АПУ-гийн Г.Батхүүтэй ширүүн маргалдаж буй 13 секундын бичлэг УИХ-ын гишүүн Н.Номтойбаярыг шорон руу түлхэж мэдэх нь ээ" гэсэн нийтлэл тавигдсан. Миний зүгээс үнэнд үл нийцэх тус нийтлэлийг хэний захиалгаар бэлтгэсэн, ямар зорилгоор бэлтгэсэн зэрэгт анхаарлаа хандуулж, судалгаа хийсэн.

Энэ хугацаанд дараахь мэдээллүүдийг олов.

-2019 оны аравдугаар сард АПУ компанийн эздийн хамаарал бүхий этгээд Ж гэгч Н.Номтойбаярыг гүтгэх гэрч хайж байгаа, 2019 оны арваннэгдүгээр сарын эхээр иргэн Г түүний найз болох цагдаагийн байгууллагад ажиллаж байсан Г-ээр дамжуулан холбогдсон нэгэн хүнд АПУ-гийн П.Батсайханд тус болох хүнийг нэг тэрбум төгрөгөөр шагнана гэсэн.

-2019 оны арваннэгдүгээр сарын 24-нд АПУ компанид ажилладаг иргэн Я ньиргэн Б-тэй холбогдож “Н.Номтойбаярын эсрэг бидэнтэй хамтрах уу, хэрэв хамтарвал хилийн хоригийн асуудлыг цуцлуулж, гэрч хамгаалах хөтөлбөрт хамруулж болно шүү” гэсэн байна.

-Мөн уржигдар талийгаач Б-гийн ар гэрийн өмгөөлөгч Ж.Батхуяг гэх өмгөөлөгч мэдээлэл хийсэн. Эдгээрээс дүгнэж хэлэхэд талийгаач Б-гийн ар гэрийнхнээс намайг гүтгэхээс гадна онц хүнд гэмт хэрэгт алуурчин болгож яллах арга хэмжээг зохион байгуулалттай явуулжээ. Иймд энэ гомдлын дагуу би иргэн Г, Я, Б, Г гэх эзэн холбогдогчтой нэрсийг цагдаагийн байгууллагад тайлбар мэдүүлэг өгөхдөө өгнө.

Талийгаач Б-гийн ар гэрийнхнээс мэдээлэл өгөхдөө ноцтой хэд хэдэн зүйлсийг хэлсэн. Би дөрвөн өргөдлийг цагдаагийн байгууллагад өгч байгаа. Миний өөрийн санаачилгаар өгсөн полиграф тестийн дүгнэлтийг илт мушгиж гуйвуулсан. Талийгаачийн унасан газраар явж байсан уу гээд өчнөөн олон асуултад хариулт авдаг. Тэгэхэд миний хариулт 80-90 хувьтай үнэн гэж гарсан. Үхлийн шалтгааныг Тархины цус харвалт гээд тогтоочихсон байхад яагаад мушгин гуйвуулж байгаа юм бэ.

АСУУДАЛ-2: Цэнгээний газарт болсон зодооны бичлэг

БАЙР СУУРЬ-2: Зодооны асуудлаар дөрөөлөн түүнийг гэмтэн болгож харагдуулах гэв үү

Энэ талаар түүний хийсэн албан ёсны тайлбарыг хүргэе

-Юу болсныг та бүхэн тайлбарлалтгүй мэдэж байгаа. Гавлын яс хоёр газраа хугарсан, нэлээд хүнд бэртэл авсан. Гэхдээ түүн дээр өөрийгөө зөвтгөх гээд байх зүйл байхгүй. Энэ хүрээнд бусдад гомдоод байгаа зүйл байхгүй. Холбогдох хуулийн дагуу хариуцлага хүлээхэд миний бие бэлэн. Залуу хүн бас алдсан байна. Би ч бас алдаа гаргалаа. Түүндээ хүлцэл өчье. Хэдийгээр твиттерээс жиргээ явуулсан ч өөрийнхөө биеэр хариуцлагатайгаар камерын өмнө ярих нь зүйн хэрэг. Энэ асуудлын хүрээнд хэн нэгэнд гомдож тунирхсан зүйл бол байхгүй.Би өөрийгөө буруутай гэж үзэж байна.

АСУУДАЛ-3: УИХ-ын гишүүн Н.Номтойбаярын бүрэн эрхийг түдгэлзүүлэх эсэх

БАЙР СУУРЬ-3: ХБДХ: УИХ-ын гишүүн Н.Номтойбаярын бүрэн эрхийг түдгэлзүүлэх шийдвэр гаргалаа

-УИХ-ын Халдашгүй байдлын дэд хороо УИХ-ын гишүүн Н.Номтойбаярын бүрэн эрхийг түдгэлзүүлэх Улсын Ерөнхий прокурорын саналыг Төрийн ордонд хаалттай хэлэлцэж, улмаар гишүүний бүрэн эрхийг түдгэлзүүлэх шийдвэр гаргажээ.

Уг санал энэ сарын 15-ны өдөр УИХ-д ирсэн бөгөөд дэд хорооны гишүүдийн ирц бүрдэхийг хүлээн ийнхүү хойшлоод байсан юм. Ийнхүү 15 цаг 30 минутад эхэлсэн хуралдаан дөрвөн цаг үргэлжилсний эцэст гишүүний бүрэн эрхийг түдгэлзүүлэх шийдвэрийг гаргав. Одоо дэмжсэн саналыг Төрийн байгуулалт, Хууль зүйн байнгын хороогоор хэлэлцсэний дараа УИХ-ын чуулганаар хэлэлцэх юм.

УИХ-ын гишүүний халдашгүй байдлын дэд хорооны дарга Ц.Нямдорж: "Прокурорын ирүүлсэн санал нууцын зэрэглэлтэй, мөрдөн байцаалтын нууцлалтай байгаа учраас бид хаалттай хуралдаж, шийдвэр гаргалаа. Н.Номтойбаярыг бүрэн эрхээ түдгэлзүүлээд нэрээ цэвэрлэх нь зүйтэй гэж үзлээ" гэлээ.

БАЙР СУУРЬ-3: Н.Номтойбаяр: Би хууль зөрчиж, гэмт үйлдэл гаргаагүй

-Бүрэн эрхийг түдгэлзүүлэх эсэх асуудалд нэгдүгээрт, би өөрийнхөө гэм буруугүйг нотлоно. Би УИХ-ын дарга, гишүүдэд өөрийнхөө тайлбарыг хүргүүлсэн. Нэгэнт би хууль зөрчөөгүй, гэмт үйлдэл гаргаагүй хүн өөрөө санаачлагаараа бүрэн эрхээсээ түдгэлзэнэ гэж байхгүй. Миний ганц л хүсч байгаа юм байгаа. Энэ бүх асуудлууд, нотлох баримтууд хэвлэлээр ил тод, нээлттэй л явмаар байгаа юм. Халдашгүй байдлын дэд хороо хуулийн хүрээнд нотлох баримт дээр тулгуурлах биш, улстөрийн шийдвэр гаргадаг юм байна. Надад хууль зөрчсөн үйлдэл байхгүй. Одоо их хурлыг нээлттэй явуулах хэрэгтэй.