Охиноо эмчлүүлэхийн тулд шалган нэвтрүүлэх цэгээр оруулахыг гуйж буй нь. Зургийг: REUTERS агентлаг, Thomas Peter

Хятадад коронавирусын дэгдэлтийг хянахын тулд хөл хорио тогтоогоод байгаа. 50 настай Лу Юэжин вирусын голомт болох Хубэй мужаас гарахын тулд Янцзэ голын гүүрэн дээрх цагдаагийн шалган нэвтрүүлэх цэгээр нэвтрэн өнгөрөхөөр хичээж буй нь.

Хубэй мужийн гүүрний хажуугийн тосгоноос ирсэн фермер Лугийн охин Ху Пин нь лейкеми буюу цусны цагаан эсийн хорт хавдартай. Тэрбээр коронавирусын халдварын голомт болсон Вухан хотын эмнэлгүүдэд химийн эмчилгээний хоёр дахь шатны эмчилгээгээ хийлгэж чадахгүй байгаа юм.

Лу шалган нэвтрүүлэх цэг дээр “Миний охин Жиүжан дахь эмнэлэгт очих хэрэгтэй байна. Тэр эмчилгээгээ хийлгэх хэрэгтэй. Гэхдээ биднийг нэвтрүүлэхгүй байна” гэв.

Тэрээр охиноо хөнжлөөр боож, газар суулгасан байсан бөгөөд нулимстай нүдээр цагдаагаас нэвтрүүлэхийг гуйж “Гуйя, охиныг минь аваач дээ. Би заавал нэвтрэх шаардлагагүй. Зүгээр л охиныг минь явуулаач" гэж байлаа.

“Жиүжан хотод оршин суугчдыг нэвтрүүлэхгүй” хэмээн чанга яригчаар давтамжтай зарлахыг сонсоод сэтгэлээр унаж буй нь илт байв.

Хятадад одоогоор 14 мянга гаруй хүн уг вирусээр халдварлаж, 300 орчим хүн нас барсан учраас вирусын тархалтыг зогсоох зорилгоор гүүрийг тодорхойгүй хугацаагаар хаасан нь энэ юм.

Ойрын өдрүүдэд олон арван хүн шалган нэвтрүүлэх боомтоор нэвтрэхийг оролджээ.

Бямба гарагийн өглөө, Лугийн хувьд охиныхоо нөхцөл байдлын талаар холбогдох хүмүүсд мэдэгдэж байсан юм.

Лу: "Миний хүсч байгаа зүйл бол охиныхоо амьдралыг аврах явдал" гэв.

"Ройтерс" агентлагтай ийнхүү ярьснаас хойш цаг орчмын дараа цагдаа нар хөдөлж, түргэн тусламж дуудан, эцэст нь Лу, Ху хоёрыг хоёуланг нь нэвтрүүлжээ.

Эх сурвалж: REUTERS

Ц.АНУДАРЬ