Засгийн газрын хуралдаан өнөөдөр боллоо. Засгийн газрын Хэвлэл мэдээлэл, олон нийттэй харилцах хэлтсийн дарга Ц.Ганзориг “Шинийн 4-нөөс эхлэн хөдөө явах, сар шинээ нөхөж хийх зэргээр олны хөл хөдөлгөөн ихсэх эрсдэл ажиглагдаж байгаа учраас шинийн 8-ныг дуустал буюу гуравдугаар сарын 2-ны даваа гариг хүртэл орон нутгийн зам, Улаанбаатар хот руу орох, гарах урсгалыг хязгаарлах санал Ерөнхий сайд гаргасан. Улсын Онцгой комиссоор энэхүү асуудлыг эцэслэн нарийвчилж батална. Үүнтэй холбоотойгоор иргэдээс асуулт их ирж байгаа. Жишээ нь хорио тавихаас өмнө ажлаасаа чөлөө аваад хөдөө явсан хүмүүс буцаж яаж гэртээ ирж ажилдаа явах вэ гэх мэт зүйлс бий. Иймээс иргэдийн амьдран суудаг хаягийг үндэслэн нийслэл рүү нэвтрүүлэх зэрэг зохицуулалтыг Улсын онцгой комисс эцэслэн шийднэ.

Ерөнхий сайд Японы нислэгийг цуцлах санал оруулсан. БНСУ руу хийж байгаа нислэгүүдийг цуцалсан. Маргааш ажлын өдөр хэвээрээ. Төрийн байгууллагууд өндөржүүлсэн бэлэн байдалд 24 цагаар ажиллана. Засгийн газраас тогтоол гаргаж хамгаалах хувцас хэрэгсэлд шаардагдах төсвийг баталлаа. Өмнө нь 4.2 тэрбум төгрөгийн төсөв баталсан байсан бол сая дахин 6.5 тэрбум төгрөгийн төсвийг нэмж батлаад байна. Эмнэлгийн хэрэгсэл, хамгаалалтын хувцас захиалсан. Эдгээр хэрэгсэл Сөүлд ирчихсэн байгаа. Энэ ачааг татаж авах асуудал яригдаж байна. Өнөөдрийн байдлаар БНСУ-ын Инчоны нисэх буудал дээр дамжих өнгөрөх нислэгийн нэг ч зорчигч байхгүй. Одоогоор Турк, Орос, Казахстаны нислэг нээлттэй байгаа. Бангкок, Наритагийн нислэгүүд өнөөдөр хамгийн сүүлчийн нислэгээ үйлдээд маргаашаас зогсоож байгаа.

Ерөнхий сайд БНСУ-д Монгол Улсын иргэн нас барсанд хуралдаан эхлэхэд эмгэнэл илэрхийллээ. БНСУ-д нас барсан манай улсын иргэний үхлийн шалтгааныг тус улсын талаас албан ёсоор ирүүлнэ. Вирусээс эсвэл өөр өвчний улмаас нас барсан уу гэдгийг албан ёсоор мэдээлэх болно. Тухайн иргэн өмнө нь Солонгос улсад дөрвөн жил ажилласан. Тэрээр хоёрдугаар сарын 12-нд Монголоос тус улс руу явсан. Очоод эмнэлэгт шинжилгээ өгсөн. Солонгост халдвар авсан 2-3 тохиолдол тухайн иргэний шинжилгээ өгсөн эмнэлгээр үйлчлүүлж байсан юм билээ. Тэгэхээр Солонгост очоод халдвар авсан байх магадлал өндөр байгаа. Ойр байсан зургаан хүнээс нь шинжилгээ авахад хариу нь сөрөг гарсан. Хоёрдугаар сарын 12-нд хамт ниссэн хүмүүсийг нь тусгаарлаад ажиглаж байгаа" гэв.