Хятадын эрх баригчид энэ долоо хоногт Хонгконгод аюулгүй байдлыг сахиулах хуулийг Бүх Хятадын ардын төлөөлөгчдийн хурлаар хэлэлцэн дэмжиж, дараагийн шатны байгууллагад уг хуулийг батлуулахаар шилжүүлсэн. Тэгвэл үүнтэй холбогдуулан АНУ-ын Ерөнхийлөгч Дональд Трамп өчигдөр Цагаан ордонд болсон хэвлэлийн хурлын үеэр Хонгконгтой Хятадаас давуу байдлаар харьцдаг байснаа больж байгаа талаараа мэдэгджээ.

Түүнчлэн Хонгконгийн өөртөө засах онцгой статусыг сулруулахад шууд болон шууд бусаар оролцсон Хятадын албан тушаалтнуудын эсрэг эдийн засаг, санхүүгийн болон визний хориг тавина хэмээн мэдэгдсэн байна.

Хонгконгод аюулгүй байдлыг сахиулах энэ хууль наймдугаар сар гэхэд эцэслэн батлагдаж, хэрэгжих төлөвтэй байгаа билээ. Хэрэв энэ хууль хэрэгжвэл Хонгконгод Бээжингийн эрх мэдлийг үл хүндэтгэсэн аливаа үйлдлийг эрүүгийн хуулиар зохицуулах үндэс бүрдэх ажээ.