Нийгмийн сүлжээнд хүүхэд бүрд бага ангиас нь Англи хэл заахаар зүйл заалт оруулахаар төлөвлөгдөөд буй Боловсролын ерөнхий хуулийн төслийн талаар өрнөх сэтгэгдлүүдээс ажиглавал “Англи хэл заах нь буруу, дэлхийн боловсролын чиг хандлагаас ухрах...” гэх мэтийн буруу зөрүү үг, өгүүлбэр нэг ч алга. Гагцхүү Монгол хүүхдийн нас сэтгэхүйд хар багаас нь гадаад хэлний өгөгдөл суулгаж эх хэлний дархлаа алдагдах вий гэсэн зовнил байна.

Хүүхдийг 6 настай сургуульд оруулдаг бодлого алдаатай нь эрс тэрс уур амьсгалтай, ахуйн онцлогтой Монгол улсад гэр бүл, хүн ам зүйн олон асуудал, саад бэрхшээл бий болсноос харагдана.

Хүүхдэд хэдэн наснаас нь эхлэн ямар боловсролыг хэдий хугацаанд яаж эзэмшүүлэх вэ гэдэг дээр цоо шинэ бодлогын өөрчлөлт хийх шаардлага аль хэдийн урган гарсаар уджээ. Бага ангийн сурагчид эх хэлээрээ нас сэтгэхүйн онцлогтоо тохирсон цөөхөн чанартай хичээл, ахлах ангийнхан ирээдүйн мэргэжлээрээ цаашид суралцахад дөхөм болох үүднээс сонирхсон салбарынхаа хичээлийг давуулан судалж нарийсгадаг систем хэрэгтэй. Жишээ нь гадаад хэлний мэргэжлээр цаашид суралцан мэргэжил эзэмших сонирхолтой хүүхдүүд дунд ахлах ангиасаа энэ чиглэлээрээ мэргэшээд явдаг бодлогын шинжтэй өөрчлөлт шаардагдаж байгаа. Мэдээллийн асар хурдацтай эрин зуунд мэдлэгийг өөртөө шингээх, түүнээ амьдрал ахуй, боловсролдоо хэрэглэж чаддаг арга барил сүүлийн үед чухал болжээ.

Хаа байгаа өндөр хөгжилтэй орны бодлого хөтөлбөрийг шууд хуулбарлаад алддаг тохиолдол бидэнд харамсалтай нь их. 6 настай хүүхдэд шинжлэх ухааны мэдлэг олгох асуудал бэрхшээлтэй. Тиймээс хамгийн түрүүнд наад зах нь Монголдоо үйлдвэрлэсэн бараа бүтээгдэхүүнийг мэддэг, хэрэглэдэг дадалд сургах нь зөв болов уу. Ийм суурийг тавьж чадвал хүүхэд цаашдынхаа мэргэжил сонголтод няхуур, төлөвлөлттэй хандана.

Монгол хүнд тохирох боловсролын тогтолцоо зайлшгүй ба одоогийнх хоцрогдмол, нийгмийн талцуулам олон асуудал араасаа дагуулдаг. Түрүүлээд гадаад хэл эзэмшсэн хүүхдүүд гадаад хэлийг гүнзгийрүүлэн судлах боломжоор хомс хүүхдүүдтэй харьцуулагдах боломжгүй. Өөрөөр хэлвэл нийгмийн тэгш бус байдал талуудын боловсролын зах зээлд өрсөлдөх чадварыг үгүй хийж байна. Гадаад хэл төгс мэддэг мөртөө Монгол сэтгэлгээгүй, эх хэлээрээ ярьж бичихдээ маруухан боловсрол ч өрөөсгөл. Эх хэл бичиг соёлоос Монгол төлөвшлөө юун түрүүн олохын зэрэгцээ хэрэгцээгүй олон хичээл үзэх бус нас сэтгэхүйд нь тохирох цөөхөн чанартай судлагдахууныг сонирхолтой хүртээмжтэй заах арга барилаар хүүхдэд эзэмшүүлбэл боловсролын тогтолцооны зөв суурь тавигдана гэдэг. Өнгөрсөн хугацааны гол алдаа бол үе болгонд өөр хөтөлбөр шахаж Монгол хүүхдүүдийг туршилтын туулай болгон боловсролын систем доголдох хэмжээнд хүргэсэн.

Бидэнд боловсрол, эх оронч сэтгэлгээ ус агаар мэт хэрэгтэй. Эх оронч сэтгэлгээтэй, хөгжил дэвшлийг ойлгож ухамсарладаг шинэ үеийг бэлтгэхийн тулд хожимдолгүй л системтэй өөрчлөлтүүдийг хэрэгжүүлэх, бидний гол үнэт баялаг болох уламжлалт нүүдэлчин ахуй соёлын онцлогоос авхуулаад Монгол хүн гэж хэн бэ? Хэн байсан бэ? Хэн байх вэ? Гэх мэтчилэн маш энгийн асуудлуудын хүрээнд боловсролын тогтолцооны өөрчлөлтийг түргэсгэх, наад зах нь эх орноороо бахархах, хайрлах, хамгаалах үзлийг хүүхдүүдэд төлөвшүүлэх, таниулахаас эхэлмээр.