Жил бүрийн элсэлтийн ерөнхий шалгалт эхэлмэгц Боловсролын үнэлгээний төвтэй холбоотой асуудал эцэг эхчүүдийн санааг чилээх юм. Тодруулбал, өнгөрөгч 2021 онд Монгол хэл бичгийн шалгалтын үеэр шалгалтын материалыг алдаатай зассан асуудал гарч, нэлээдгүй шуугиан дэгдээсэн. Харамсалтай нь тухайн үед БҮТ-өөс уг асуудлыг эрс няцаагаад, салбарын сайд нь ч чимээгүй өнгөрсөн.

Ийнхүү уснаас цэвэр гарахдаа сурамгай боловсролын салбар тэр дундаа БҮТ-ийн ЭЕШ-ын зохион байгуулалтад эцэг, эхчүүд дахин бухимдаж, сэтгэл дундуур байгаагаа илэрхийллээ. Учир нь ЭЕШ өгөх хүүхдүүд, хариултын хуудсыг бөглөхдөө заавал 2В харандаа, баллуур ашиглана гэжээ.

Тус шийдвэртэй холбогдуулан 2В харандаа, баллуур хайсан хүүхдүүд, эцэг, эхчүүд дэлгүүрүүдэд дараалал үүсгэж эхэлсэн байна.

Ийнхүү эрэлтээ дагаж 500₮-ийн үнэтэй байсан харандаа дийлэнх газруудад 2000₮ болоод зогсохгүй, хөдөө орон нутагт огт олдохгүй байгаа гэнэ. Эцэг эхчүүдийн зүгээс уг асуудалд эзэн холбогдогчоор шалгалтыг зохион байгуулж байгаа БҮТ-ийг буруутгаж байна.

Гэтэл БҮТ-өөс өнөөдөр уг мэдээлэл нь ташаа хэмээн мэдэгдэв. Ийнхүү монголд уснаас хуурай гардаг, асуудал гарахаар өөрсдөөсөө холдуулдаг, эзэн холбогдогчгүй ажлууд ар араасаа хөвөрсөөр. Эцэг эхчүүдийн зүгээс уг санаачилга, шийдвэр хэний хурган бизнес болохыг мэдэхийг санаархахын сацуу, нэг нэгэндээ ингэж чирэгдэл болохгүй байхыг хүсэж байгаа юм.