Европын Холбоо /ЕХ/ газрын ховор элемент олборлох чиглэлээр хамтран ажилласны хариуд Латин Америкийн орнуудад 10 тэрбум еврогийн хөрөнгө оруулахаа амлалаа. Энэ талаар Европын комиссын тэргүүн Урсула фон дер Ляйен даваа гарагт Бразилд айлчлахдаа хийсэн хэвлэлийн бага хурлын үеэр мэдэгдсэн байна. Европын хөрөнгө оруулалтыг эн түрүүнд уур амьсгалын өөрчлөлттэй тэмцэх, ногоон эрчим хүч, дижитал эдийн засгийг хөгжүүлэх төслүүдэд хийх аж.

"ЕХ нь Латин Америкийн орнуудад 10 тэрбум еврогийн хөрөнгө оруулж байгаа нь хувийн хэвшлийн хөрөнгө оруулалтыг улам ихээр татах үндэс суурь болно" гэж фон дер Ляйен хэлээд "Бид Бразилтай газрын ховор элемент олборлох стратегийн түншлэлийг эхлүүлж байна. Энэхүү түншлэл ногоон шилжилтийн гол хүчин зүйл болох эдгээр нөөцөөр манай тивүүдийн хэрэгцээг хангахад хувь нэмэр оруулах ёстой” гэж цохон тэмдэглэжээ.

Тэрбээр мөн Бразилын "эрчим хүч, бордооны салбарт тулгарч буй асуудалд ЕХ-ны хориг арга хэмжээ бус Оросыг буруутгаж, Украин дахь мөргөлдөөний талаар баримталж буй Брюсселийн байр суурийг Бразил дэмжинэ гэдэгт найдаж байгаагаа илэрхийлсэн байна.

ЕХ нь Бразилд байгаль орчинд ээлтэй устөрөгчийн түлшний үйлдвэрлэлд 2 тэрбум евро, ширэнгэн ойг хамгаалах төслүүдэд 430 сая еврогийн хөрөнгө оруулж байгааг тэрбээр онцолсон байна.

Үүнээс гадна, "Бразилыг дахин үйлдвэржүүлэх худалдааны хамтын ажиллагаа өрнүүлж, "зөвхөн эдийн засгийн салбарын төдийгүй хамгийн өргөн хүрээний яриа хэлэлцээний платформ болохоо" амлажээ.

Д.Жаргал

Эх сурвалж: "Монцамэ" агентлаг