Англи хэлийг Монголын үндсэн гадаад хэл гэж нэрлээд л бүх ЕБС-д 3-р ангиас заах хөөрүү хуулийн төсөл оруулж ирээд Монгол хэлний дархлааны асуудал, чинад урхагыг судлаагүй УИХ-ын зарим гишүүд уйлагнан хэвлэлээр ярих нь цаагуураа их мөнгөний эсвэл гадаадын явуулгаар зүтгүүлж байсан төсөл нь унахаар аргагүй хүмүүнлэг элчийн дүр эсгэж ард түмэнд хайртай дуртай царайлах шиг. Тэдний гаргах авир нь доромжилсон басамжилсан өнгө аясыг шууд илэрхийллээ.

Өөрөөр хэлбэл баян орнуудын ойлголтоор Монголын зонхилох хүн амын доторх боловсролын түвшин Англи сурах бололцоогүй хүүхдүүдээр дүүрэн бөгөөд хууль баталж байгаад л Англи хэл сургаж хөгжүүлэх нь баргийн хүний чадахааргүй гайхамшигт үйл, Англи хэл сурах нь бүдүүлэг монголчуудын тэргүүний зорилт гэж харагдуулжээ.

Гэхдээ бид Монгол хүн учраас нэгэн цагт дэлхийг эрхшээсэн агуу уламжлалаа умарталгүй баялаг яруу төрөлх хэлээ бүрэн гүйцэт эзэмшиж үр хүүхдээ ч хэл соёлынхоо дархлаагаар хүмүүжүүлж гэгээрүүлэх нь төрийн чухал бодлого байх ёстой атал харийн соёлд хэт дулдуйдан сэвэх нь ямар ч тусгаар улсын чиг баримжаанд үл тохирох билээ.

Орчин цагийн хандлага ялангуяа боловсролд туйлширцгаах нь буруу. Дэлхийн тэргүүлэх гадаад хэл Англи хэл бөгөөд шинжлэх ухаан технологийн хэрэгцээнд нэвтэрсэн хамгийн түгээмэл хэл мөн. Ямар ч үндэстэн аливаа ертөнцийн явдлыг өөрсдийн хэл соёлоороо хүртэж ойлгох ухаарах нь тус тусын онцлог дархлаагаа суулгаж буй хэрэг. Глобалчлал хэдий үр дүнгээ өгсөн ч цоо шинээр урган гарах дэлхийн дахины нөхцөл байдал үндэстэн ястнууд оршихуйн асуудал руу улам бүр гүнзгий нэвтэрч хөгжихийн эхлэл дотоод нөөц боломжоо тооцоолж тэс үлдэхүйг баримтлах байдал руу эргээд орж байгаа үед жижиг буурай орнуудыг нэгтгэх их гүрнүүдийн геополитикийн суманд өртөж амархан муужрамгүй.