Эрх мэдэл, эд хөрөнгө дагасан аархал сүүлийн жилүүдэд улам гаарчээ. Улс төрд нөлөөтэй, тэрбумтан л бол хүн алахаас ч сийхгүй этгээдүүд даварсаар эцэстээ ард түмэн авлигалаар хөлжигчдөөс “эмээх” шалтгаан тэдэнд хууль үйлчлэхгүй. Төрийн өндөр албан тушаалтан, сайд дарга нар нийтийг хохироох санаатай болон санамсаргүй алдаа завхралдаа ямар нэг хариуцлага хүлээдэггүй, тэр ч бүү хэл уучлалт гуйх нь ховордож ёс зүйн ёроол, шавар намагт живцгээжээ.

Саяханы жишээнээс харахад л баян группын эзэн малчдыг машинаараа хөөж дайрсан нь хүний санаатай алахыг завдсан ил цагаан гэмт хэрэг атал өнөөхийн охин төрийн сайд өөрөө тэрбумтан болохоор асуудал өдий хүртэл удааширчээ.

Хэрвээ жирийн иргэн ийм үйлдэл гаргасан бол тэр дор нь баривчлаад хэрэг нь шүүхээр шийгдээд асуудал намжмал байх сан. Гэвч мартагнуулахаар хичээх Монголын ялзармал хууль, шүүхийн байгууллага хөдлөх нь үү?

Бас төрийн сайд хүн эрх баригч нар өөрсдөө нийтэд илчэлсэн нүүрсний хулгайн асуудлыг илт өмгөөлсөн мэдэгдэл хийж түүндээ өөрөө гэмших ч үгүй хээв нэг хэрүүл уруул хийхэд түүнийг нүүрснийг хулгайч нартай хамсаатан байх магадлалтай гэх үндэслэлээр шалгах ч бүрэн боломжтой атал нүдэн балай чихэн дүлий өнгөрөөж байгаагаас үзвэл Монголд шударга ёсны хэлтэрхий үлдээгүй бололтой.

Хөгжлийн банкны хэрэг гэгчид сөрөг хүчний лидерүүдийг аваачиж нэг газар суулгаад өдөр бүр үйл тамыг нь үзэж, ЖДҮ, нүүрсний хулгай, оффшор,сангуудыг цөлмөсөн бусад олон асуудлууд улс төрийн мананд төөрөөд зарим нь ор тас мартагдаж, ганц нэг нь сонгуульд зориулж ашиглагдахаар уран сайханжиж байгаа бололтой.

Ядуусын амьжиргаа улам л хумигдаж, баячуудын аархал хэрээс хэтрэх ийм нийгмийг эрс шинэчлэхгүйгээр ямар нэг мухар найдвар тээгээд нэмэргүй.