Хар тэнгисээр үр тариа тээвэрлэх гэрээний ОХУ-тай холбоотой нөхцөл хэрэгжиж эхэлмэгц Москва гэрээнд эргэн нэгдэнэ гэж тус улсын Ерөнхийлөгчийн хэвлэлийн нарийн бичгийн дарга Дмитрий Песков сэтгүүлчдэд өнөөдөр мэдээлжээ.

Тэрбээр “уг гэрээ үндсэндээ өнөөдрөөс хэрэгжихээ больж байгааг” тэмдэглэсэн байна.

“Үр тарианы гэрээ зогссон. Оросын тавьсан нөхцөл хэрэгжмэгц Оросын тал энэ хэлэлцээрийг хэрэгжүүлэхэд нэн даруй эргэн нэгдэнэ" гэж Кремлийн хэвлэлийн төлөөлөгч онцлон тэмдэглэжээ.

Крымийн гүүрний хэсгийг дэлбэлсэн нь уг гэрээг сунгах талаар Оросын байр суурьт нөлөөлсөн эсэх тухай асуултад тэрбээр, "Эдгээр нь хоорондоо холбоогүй. Халдлага болохоос өмнө энэ байр суурийг Путин мэдэгдсэн. Хэрэв тэд бидний нөхцөлийг биелүүлбэл бид гэрээнд эргэж нэгдэнэ“ гэж хариулсан байна. Долоодугаар сарын 17-нд шилжих шөнө Украины тал Крымийн гүүрийг дэлбэлсэн гэж Оросын терроризмтой тэмцэх хороо өнөөдөр мэдэгдсэн юм.

Долоодугаар сарын 13-нд Оросын Ерөнхийлөгч Владимир Путин тус улсын тавьсан болзлыг биелүүлэхгүй бол үр тарианы хэлэлцээрт оролцохоо зогсооно гэж мэдэгдсэн. Тодруулбал, талуудын хооронд байгуулсан санамж бичгийн заалтууд хэрэгжихгүй байгаа аж. Үр тарианы хэлэлцээр хэрэгжих хугацаанд ОХУ-ын бордоотой нэг ч хөлөг онгоцыг явуулаагүй гэж Оросын тал мэдэгдэж байгаа юм.

ОХУ мөн үр тарианы хэлэлцээрийг сунгахаас татгалзаж байгаагаа өнөөдөр Турк, Украины талд болон НҮБ-ын нарийн бичгийн дарга нарын газарт албан ёсоор мэдэгдсэнийг тус улсын Гадаад хэргийн яамны хэвлэлийн төлөөлөгч Мария Захарова мэдэгдсэн байна.

Оросыг энэхүү хэлэлцээрт оролцохоо зогсоосон тухай мэдэгдсэний дараа Чикагогийн биржийн арилжаа эхлэхэд улаан буудайн ирэх есдүгээр сарын фьючерс хэлцлийн үнэ 2.95 хувиар өсөж, нэг бушель нь 6.81 ам.долларт хүрчээ.

Д.Жаргал

Эх сурвалж: "Монцамэ" агентлаг