АНУ-ын Хавай мужийн аялал жуулчлалын гол бүс болсон Мауй арлыг хамарсан томоохон хэмжээний ой хээрийн түймэрт 6 хүн өртөж амь насаа алдаж, 20 гаруй хүн гэмтэж бэртсэний дотор хэд хэдэн гал сөнөөгч байгаа тухай хотын захирагч нь мэдээллээ. Хүчтэй салхины улмаас гэрэл цахилгаан үүрэн холбооны шонгууд нурсны улмаас одоогоор 12 мянган айл өрх гэрэл цахилгаангүй үүрэн холбооны сүлжээгүй болжээ.

Одоо гамшгийн бүсэд мужийн онцгой байдлын алба Америкийн тэнгисийн явган цэргийн анги нэгтгэл гал сөнөөх ангийн 1000 гаруй алба хаагч ажиллаж аврах, эрэн хайх нүүлгэн шилжүүлэх ажлыг зохион байгуулж байна. Аврах албаны өгч байгаа мэдээллээр сураггүй алга болсон 20 гаруй хүний мэдээлэл байна. Цаашид амиа алдсан хүний тоо нэмэгдэж болзошгүйг анхаарууллаа. Мөн аялал жуулчлалын зорилгоор ирсэн 4000 гаруй жуулчныг аюулгүй буцаах ажлыг Хавай мужийн тээврийн алба зохин байгуулж байна. Түймрийн улмаас 13 мянган оршин суугчтай Лахайна хот бараг тэр чигтээ сүйрчээ.

Хавай арлын хэмжээнд одоогоор нийтдээ томоохон хэмжээний 3 түймэр ассан байдалтай байна. Иймд түймрийн голомтоос холгүй оршиж буй хот суурин газруудаас иргэдийг нүүлгэн шилжүүлж авто замыг хааж жуулчдыг түр хугацаанд хүлээн авахгүй байх журам гаргасан байна. Хавай мужийн цаг уурын албаны мэдээлж байгаагаар Номхон далайн эрэг дагуу үүссэн хүчтэй хар салхины нөлөөгөөр хуурайшилт өндөртэй бүс нутагт ой хээрийн түймэр дэгдэх гол шалтгаан нөхцөл нь болсон байна. Салхины эрч цагт 131 км цаг хүрч ширүүссэн нь түймрийн хамрах хүрээг тэлэх гамшгийн эрсдэлийг улам нэмэгдүүлж байна гэж аврах албаныхан хэлж байна.