“Монголын эдийн засаг сэргэж байна. Өсөлттэй гарлаа. Төсвөөс одоо л үр ашгаа хүртэх цаг боллоо” гэх ЗГ-ын өнгөн дээрээ сүржиндүү бодит байдал нь даржин мэдэгдлүүдийн цаана өргөн хэрэглээний хэт үнийн өсөлтийг хазаарлах бодлого дутагдаж байна. Бизнесийн орчны хөгжил тун муу байгаагийн цаана татварын дарамт байдаг. Татварын бодлого тун бүдүүлэг буюу бараг л алба гувчуурын дайтай. Ийм байхад чөлөөт зах зээлийн зарчмаараа авлигалын асар өндөр хана хэрмийг даван ард иргэдэд эдийн засгийн үр өгөөж наалдах нь үлгэр шиг л санагдах.

Монголчууд ч баярлах эрхтэй учраас хэд гурван төгрөгөөрөө баярын бэлтгэлээ базаасаар сарын хэрэглээний мөнгөө хуу үрцгээж өнөөх мөнгөний урсгал явсаар Хятад улсын Эрээний бараагаар солигдож үр дүнд нь бидний хүч хөдөлмөрийн хөлс, баялгийн хэлтэрхий гадаад зах зээлийн валют бүрдүүлэлтийн тодорхой хувь болоод дуусдаг.

Монголдоо наалддаг юу ч үгүй. Ийнхүү баяр завсарлах хэдхэн долоо хоногт үнийн өөрчлөлтүүд байнга савлагаатай. Шатахуун хомсдож дэлгүүрүүд барааныхаа үнийг тэнгэрт тулгаж байж шархаа нөхөхөөс өөр аргагүй байдал бий болсон. Ийм үед төр засгийн зүгээс цалин нэмдэг харалган бодлогоосоо татгалзаж иргэдийн амьжиргаанд нэмэртэй хөнгөлөлттэй зээл, уян хатан татварын бодлого хэрэгжүүлэх ёстой ч энэ тухай бодож байгаа нэг ч түшээ байхгүй бололтой.

Д.ЭНХБАТ