ОХУ-ын ерөнхийлөгч Владимир Путин өчигдөр Татарстаны Казань хот дахь үйлдвэртэй танилцах үеэрээ шинэчлэн сайжруулсан Ту-160М стратегийн бөмбөгдөгч онгоцоор ниссэн байна. Энэ онгоц нь Зөвлөлтийн үеийн онгоцны шинэчилсэн загвар бөгөөд алсын зайд цөмийн зэвсэг тээвэрлэн хүргэх зориулалттай юм. Украины дайн, Навальныйн үхэл зэргийн улмаас сөргөлдөөн хурцадсан үед хийсэн Путиний энэ үйлдэл Өрнөдийнхөнд цөмийн зэвсгийн хүчин чадлаа харуулах зорилготой нь тодорхой байна.

Тэрбээр нислэгийн дараа үүнийг Оросын агаарын зэвсэгт хүчний шаардлагад нийцэх найдвартай, орчин үеийн техник болсныг сэтгүүлчдэд ярьжээ.

Оросын төв телевизээр бөмбөгдөгч онгоцны хөөрч, газардаж буй дүрсийг харуулсан байна. Кремлийн хэвлэлийн албаны төлөөлөгч Дмитрий Песков онгоц ямар замаар ниссэн нь цэргийн нууц гэсэн бол Оросын хэвлэлүүд Путиний нислэг 30 минут үргэлжилснийг мэдээлжээ.

Ту-160М нь дөрвөн хүний суудалтай, 12 далавчит пуужин, эсвэл 12 богино тусгалын цөмийн пуужин тээвэрлэн зогсолтгүйгээр 12,000 км зам туулах чадвартай. 2018 онд ОХУ-ын засгийн газартай байгуулсан гэрээний хүрээнд үйлдвэрлэгч нь ийм 10 ширхэг онгоцыг 2027 он хүртэл тус бүрийг нь 15 тэрбум рублиэр ($163 сая) зэвсэгт хүчинд нийлүүлэх үүрэг хүлээжээ. Онгоцыг үйлдвэрлэгч Туполев компани орчин үеийн загвар нь хуучнаасаа 60 хувийн шатахууны хэмнэлттэй болж, зэвсэглэл, удирдлага нь эрс сайжирсан гэж мэдээлсэн байна. Өчигдөр бас Кремлийн хэвлэлийн алба АНУ-ын ерөнхийлөгч Жо Байдены хэлсэн үгэнд хариу өгсөн юм.

Калифорни мужид сонгуулийн хандивын арга хэмжээнд үг хэлэхдээ Байден гудамжны үг хэллэгээр Путинийг нэрлэсэн тухай эх сурвалжууд мэдээлж байв. Тухайлбал тэр “Хүн төрөлхтний оршин тогтнолд тулгарч буй хамгийн том аюул бол уур амьсгалын өөрчлөлт. Путин болон бусад галзуу SOB (son of b***)-үүд байгаа тохиолдолд бид цөмийн мөргөлдөөнөөс болгоомжлох ёстой. Гэхдээ л хамгийн гол аюул бол уур амьсгалын өөрчлөлт юм” гэж хэлжээ.

Кремлийн хэвлэлийн албаны төлөөлөгч Песков энэ талаар “АНУ-ын ерөнхийлөгч өөр улсын төрийн тэргүүний эсрэг ийм үг хэллэг хэрэглэх нь ерөнхийлөгч Путиний нэр хүндэд халдах магадлал бага. Харин ийм үг ашигладаг хүмүүсийг өөрсдийг нь гутааж байна” гэж мэдэгдсэн байна.

Тэрбээр цааш нь ярихдаа “Магадгүй тэр Холливүүдийн ковбой шиг харагдахыг оролдсон байх. Гэхдээ үнэнийг хэлэхэд тэгж чадаагүй гэж би бодож байна. Ноён Путин түүнд хандаж, ганц бүдүүлэг үг хэрэглэж байсан уу? Хэзээ ч үгүй. Тиймээс ийм үг хэллэг Америкийг гутаасан гэж би үзэж байна” гэжээ.

Эх сурвалж: Reuters