НҮБ-ын Аюулгүйн зөвлөл даваа гарагт хуралдаж, Газын зурваст яаралтай гал зогсоох тухай тогтоолд санал хураан баталсан. Харин уг тогтоол нь Израил-Хамасын хоорондын хэлэлцээг бусниулсан хэмээн Израилын талаас мэдэгдэв. Тодруулбал, тогтоолыг баталсны дараахан АНУ, Катар, Египет улсуудын зуучилсан эвлэрлийн хэлэлцээнд Хамас татгалзсан хариу өгсөн юм.

Санал хураалт явуулахад зөвлөлийн 14 гишүүн дэмжсэн бол АНУ түдгэлзсэн хариу өгсөн юм. Үүнийг нь "өмнөх байр сууриасаа илт ухарсан" шийдвэр хэмээн Израилын Ерөнхий сайд шүүмжилсэн.

Улмаар Израилын цэргийн ажиллагааны талаар өндөр түвшний төлөөлөгчидтэй хэлэлцэх Вашингтон дахь уулзалтаа хүртэл цуцалжээ.

Өмнөх санал хураалтуудад АНУ "Израил, Хамасын хооронд эвлэрэх, барьцааны хүмүүсийг суллах хэлэлцээ үргэлжилж байхад ийм тогтоол батлах нь буруу" хэмээн хориг тавьж байсан юм. НҮБ-ын тогтоолоос үл хамааран Израил Газын зурвас руу довтолсоор байна.

Эх сурвалж: ВВС