Олон улсын эрүүгийн шүүх /ОУЭШ/ мягмар гарагт ОХУ-ын Батлан хамгаалахын сайд асан Сергей Шойгу болон зэвсэгт хүчний жанжин штабын дарга Валерий Герасимов нарыг баривчлах шийдвэр гаргажээ. Тус байгууллага их хэмжээний хохирол учруулсан Украины дайны гэмт хэрэг, хүн төрөлхтний эсрэг үйлдсэн “хүнлэг бус хэрэг”-тэй холбоотойгоор уг шийдвэрийг гаргасан гэв.

ОУЭШ-ийн шүүгчид дээрх хоёр хүнийг 2022 оны аравдугаар сарын 10-наас 2023 оны гуравдугаар сарын 9 хүртэл ОХУ-аас Украины цахилгаан эрчим хүчний дэд бүтцэд өгсөн пуужингийн цохилтын хариуцлагыг хүлээх үндэслэлтэй гэж үзэж байгаа аж.

Энэ талаар Украины Ерөнхийлөгч Володимир Зеленський "ОУЭШ-ийн шийдвэр украинчуудын эсрэг үйлдсэн Оросын гэмт хэргийг шударгаар тогтоох нь гарцаагүй болсны тод илрэл" гэсэн байна. Харин ОХУ-ын Аюулгүйн зөвлөлөөс Шойгуг баривчлах тухай уг тушаалыг "ач холбогдолгүй" бөгөөд Москвагийн эсрэг явуулж буй "гибрид дайны нэг хэсэг" гэж мэдэгджээ. Өнгөрсөн сард ОХУ-ын Ерөнхийлөгч Владимир Путин Батлан хамгаалахын сайд Сергей Шойгуг албан тушаалаас нь чөлөөлж, Үндэсний аюулгүй байдлын зөвлөлийн нарийн бичгээр даргаар томилсон. Олон улсын эрүүгийн шүүхээс Ерөнхийлөгч Путиныг мөн баривчлах шийдвэр байгаа юм. Ингэснээр тус байгууллагын гишүүн орнуудад Путин хөл тавивал тухайн улс түүнийг баривчлах үүрэг хүлээж буй юм.

Эх сурвалж: The Moscow Times, BBC