Засгийн газрын ээлжит хуралдаан үргэлжилж байна. Өнөөдрийн хуралдаанаар "Нийтээр амрах баярын өдөр шилжүүлэх тухай” Засгийн газрын тогтоолын төслийг хэлэлцэхээр төлөвлөжээ.

Гэр бүл, хөдөлмөр, нийгмийн хамгааллын сайд Л.Энх-Амгалан Цагаан сарын амралтад өөрчлөлт оруулах саналаа танилцуулж, хуралдаанаар хэлэлцэн шийдвэрлэнэ.

Тус яамнаас гуравдугаар сарын 5-ны лхагва гарагт ажил эхлэх саналыг оруулж буй бөгөөд даваа, мягмар гаргийн ажлын өдрийг нөхөж ажиллах хоёр хувилбар танилцуулах юм байна.

Өнөөдөр Засгийн газрын хуралдаанаар:

-Улсын төсвийн хөрөнгөөр сүүлийн 5 жилд хэрэгжүүлсэн геологийн судалгааны ажлын тайлан, түүний үр дүнгийн талаар,

-“Тогтоол, тогтоолын хавсралтад өөрчлөлт оруулах тухай” Засгийн газрын тогтоолын төсөл /“Шинэ Зуунмод хотын хөгжлийн ерөнхий төлөвлөгөө батлах тухай”

-Засгийн газрын 2022 оны 143 дугаар тогтоол/, УИХ-ын гишүүн Х.Ганхуягийн санаачлан боловсруулсан Худалдаа, аж үйлдвэрийн танхимын тухай хуулийн шинэчилсэн найруулгын төсөл,

-Монгол Улсын хууль тогтоомж, тогтоол шийдвэрийн хэрэгжилтэд 2024 оны жилийн эцсийн байдлаар хийсэн хяналт-шинжилгээ, үнэлгээний тайлангийн талаар зэрэг 25 асуудал хэлэлцэхээр төлөвлөжээ.

НЭМЭЛТ:

Засгийн газрын ээлжит хуралдаанаар уламжлалт цагаан сарын баярын амралтын талаар хэлэлцэж, шинийн 5-ныг дуустал бүх нийтээр амрахаар шийдвэрлэжээ. Мөн 2025 ондоо багтаад аль ч үед амралтын өдрийг нөхөж болохыг төрийн бүх шатны байгууллагуудад үүрэг болгосон байна.

Монголчуудын уламжлалт сар шинийн баяр, билгийн тооллын хаврын тэргүүн сарын шинийн 1, 2, 3-ны өдөр бүх нийтээр амрахыг Хөдөлмөрийн тухай хуулийн 97.1.2-оор зохицуулсан.

Энэ жил Монгол одон зурхайн цаг тооллоор билгийн тооллын хаврын тэргүүн сарын шинийн 1-ний өдөр тасарч, шинийн 2, 3-ны өдөр амралтын Бямба, Ням гаригт буюу 2025 оны гуравдугаар сарын 1, 2-нд тохиож байна. Засгийн газрын тогтоол батлагдсанаар ирэх Бямба, Ням, Даваа, Мягмар, Лхагва гаригуудад амарч, Пүрэв гаригаас төрийн байгууллагуудын ажил, үйлчилгээ хэвийн явагдана.

Б.ЖАРГАЛ