Нийслэлийн Засаг дарга бөгөөд Улаанбаатар хотын захирагч Х.Нямбаатар Монгол Улсын засгийн газрын өнөөдөр (2025.03.19)-ийн хуралдаанаас гарсан шийдвэрийн талаар мэдээллээ.

Тэрбээр “Өнөөдрийн хуралдаанаар Улаанбаатар хотын агаарын бохирдлыг бууруулах чиглэлээр авах арга хэмжээний тухай тогтоолыг албажуулан баталлаа. Нийслэл хотод 200 мянган айл өрх хатуу түлш буюу нүүрсний хэрэглээтэй байна. Түүнчлэн 2500 орчим нам даралтын зуух, 170 орчим уурын зуух агаарын бохирдол үүсгэж байна.

Мөн бүртгэлтэй 804 тээврийн хэрэгслээс 500-600 гаруй тээврийн хэрэгсэл замын хөдөлгөөнд оролцож, ТЭЦ 2, 3, 4 болон Амгалангийн дулааны цахилгаан станцууд агаарын бохирдол үүсгэх эх үүсвэр болж байна.

Хамгийн гол нь хатуу түлш хэрэглэж буй 200 мянган айл өрх агаарын бохирдол үүсгэж буй гол эх үүсвэр болж байна. Тиймээс 2025-2026 онд 32 мянган айл өрхийг хийн түлшинд шилжүүлэх тогтоолын төслийн баталлаа.

Айл өрхүүд хатуу түлшнээс сайн дураараа татгалзах, стандартад нийцсэн дулаалга хийсэн тохиолдолд нийслэлээс тухайн айлуудад хийн түлшний зуух байрлуулах, аюулгүй ажиллагааны заавар өгөх, халаалтын улирал буюу есдүгээр сарын 15-ны өдрөөс тавдугаар сарын 15-ныг хүртэлх хугацаанд сар бүр 100 мянган төгрөгийг хийн түлшинд шилжсэн айл өрхүүдэд олгоно" гэв.