Монгол Улсын Засгийн газар, ССАЖЗЯ-наас хэрэгжүүлж буй “Go Mongolia” үндэсний брэндийн хүрээнд Английн премьер лигийн “Фүлхэм” клуб манай улсыг олон улсад сурталчлан ажиллаж буй. Тус хамтын ажиллагааны хүрээнд Монголын хөлбөмбөгийн өсвөрийн шилдэг 11 тамирчин Английн Лондон хотыг зорив.

Хөтөлбөрийн дагуу манай тамирчид Лондон хотноо энэ сарын 2-ноос 7-нд “Фүлхэм” клубын бэлтгэлийн талбайд мэргэжлийн сургалтад хамрагдах аж. Харин энэ сарын 6-нд “Фүлхэм” болон “Ливерпүүл”-ийн тоглолтоор урилгаар үзэх юм байна.

Энэхүү хамтын ажиллагааны зорилго нь ирээдүйн Монгол Улсын хөл бөмбөгийн шигшээ багийн тамирчдыг бэлтгэх, хөлбөмбөг сонирхогч хүүхэд залууст урам зориг өгөх, спортоор идэвхтэй хичээллэх сэдэл өгөх өндөр ач холбогдолтой ажээ.

Ташрамд дурдахад, “Go Mongolia” үндэсний брэнд болон “Фүлхэм”-ийн хамтын ажиллагааны хүрээнд өнгөрсөн онд тус клубийн дасгалжуулагчид манай улсад ирж ажилласан бөгөөд 160 гаруй хүүхдийг хамруулсан сургалт, шалгаруулалтыг зохион байгуулж дээрх шилдэг 11 хүүхдийг сонгосон байна.

Э.ЭГШИГЛЭН