БНХАУ-ын дарга Ши Жиньпин "Орос, Хятад хоёр ган шиг бат бөх, жинхэнэ найзууд байх ёстой" гэж хэлжээ.

Хятадын удирдагч ОХУ-ын Ерөнхийлөгч Владимир Путинтэй хэлэлцээ хийснийхээ дараа сэтгүүлчидтэй уулзахдаа "Үеийн үед найрамдалт харилцаагаа хадгалж, ган шиг бөт бөх, үнэнч найзууд байх хэрэгтэй" гэж хэлснийг Хятадын ГХЯ иш татан мэдээлсэн байна.

Ши Жиньпин хэлэхдээ, 80 жилийн өмнө милитаризм, нацизмтай нүүр тулах үед Хятад, Оросын арми, ард түмэн нэгдэж, мөр зэрэгцэн тулалдаж, мартагдашгүй түүх бүтээсэн. Хоёр орны ард түмний цусаар тогтсон агуу найрамдал хоёр орны харилцаа өндөр түвшинд хөгжих бат бөх үндэс суурь болсон” гэж хэлсэн байна.

Кремлийн ордонд болсон хоёр гүрний удирдагчийн хэлэлцээний үеэр Ши Жиньпин “Сүүлийн жилүүдэд хоёр талын хамтын хүчин чармайлтаар БНХАУ, ОХУ-ын харилцаа тогтвортой, эрүүл, өндөр түвшинд хөгжих чиг хандлагаа хадгалсаар байна.

Урт хугацааны сайн хөршийн найрсаг харилцаагаа хэвээр хадгалж, харилцан ашигтай хамтран ажиллаж, хамт хожих нь хоёр орны харилцааны томоохон, өвөрмөц онцлог болж байна. БНХАУ, ОХУ-ын харилцааг тогтвортой гүнзгийрүүлэн хөгжүүлэх нь хоёр орны ард түмний үе үеийн найрамдалт харилцааг өвлөн уламжлах зүй ёсны үүрэг хариуцлага юм.

Хоёр тал бие биеэ амжилтад хүргэж, бие биеийнхээ хөгжил цэцэглэлтийг дэмжих нь зайлшгүй сонголт. Энэ нь мөн ч олон улсын тэгш эрх, шударга ёсыг хамгаалж, дэлхийн засаглалын тогтолцооны шинэчлэлийг ахиулах цаг эриний уриалга юм” гэжээ.

Ши Жиньпин “Энэ жил, БНХАУ-ын ард түмний Японыг эсэргүүцсэн дайн, ЗХУ-ын Аугаа их эх орны дайн ба дэлхийн фашизмын эсрэг дайны ялалтын 80 жилийн ой тохиож байна. 80 жилийн өмнө Хятад, Орос хоёр орны ард түмэн үй олноор амиа өргөн байж агуу их ялалтыг байгуулан, дэлхийн энх тайвныг хамгаалж, хүн төрөлхтний хөгжил дэвшилд түүхэн хувь нэмрээ оруулсан" гэж цохон тэмдэглэжээ.

Эх сурвалж: RIA NOVOSTI, NEWS.CN
Б.ЖАРГАЛ