Хятад улс “Чехийн Ерөнхийлөгч Петр Павелтай XIV Далай ламтай хийсэн саяхны уулзалтынх нь улмаас бүх харилцаагаа тасалж байна” гэж мэдэгджээ. Өнгөрсөн сард Энэтхэгт хийсэн хувийн айлчлалынхаа үеэр Павел Төвөдийн буддын шашны удирдагчтай уулзаж, түүнд 90 насны ойн баяр хүргэсэн байна.

Далай лам 1959 онд Хятадын коммунистуудаас зугтан, Төвөдөөс дүрвэж, тэр цагаас хойш Энэтхэгийн Дхарамсала хотод амьдарч буй. Бээжин Төвөдийг өөрийн нутаг дэвсгэрийн нэг хэсэг гэж үздэг бөгөөд тус шашны удирдагчийг "салан тусгаарлагч" хэмээн буруутгаж, түүнтэй ямар ч хэлбэрийн харилцааг найрсаг бус үйлдэл гэж үзсээр ирсэн.

Хятадын Гадаад хэргийн яамны мэдэгдэлд “Петр Павел болон Далай ламын уулзалт “Чехийн Засгийн газар Хятадын Засгийн газрын өмнө хүлээсэн улс төрийн үүрэг амлалтад ноцтой харшилж, БНХАУ-ын бүрэн эрхт байдал, нутаг дэвсгэрийн бүрэн бүтэн байдалд хохирол учруулж байна” гэж дурджээ.

Чехийн Ерөнхийлөгчийн тамгын газраас айлчлалын өмнө энэ нь "хувийн шинжтэй аялал” болохыг онцолж, Ерөнхийлөгчийн албан ёсны төлөөлөгчдийн хэн нь ч түүнийг дагалдаагүй талаар мэдэгдсэн аж. Мөн “Ерөнхийлөгч Павел Японд хийсэн ажлын айлчлалаас буцах замдаа төлөөлөгчдөөсөө түр салж, Далай ламд биечлэн баяр хүргэх боломжийг ашигласан” гэж мэдээлжээ.

XIV Далай ламын дотно найзуудын нэгд тооцогддог хүн бол Чехийн анхны ерөнхийлөгч, посткоммунист Вацлав Гавел аж.

БНХАУ-ын эрх баригчид Петр Павелын үйл ажиллагаанд сэтгэл дундуур байгаагаа өмнө нь ч хэд хэдэн удаа илэрхийлж байжээ. Павел 2023 оны нэгдүгээр сард Ерөнхийлөгчөөр сонгогдсоныхоо дараахан тухайн үеийн Тайванийн Ерөнхийлөгчтэй утсаар ярьж, Бээжингийн хурц хариу үйлдлийг "өдөөсөн" байна.

Чех улс бусад олон улсын адил Тайваньтай албан ёсны дипломат харилцаагүй ч Пекин өөрийн нутаг дэвсгэр гэж үздэг тус аралтай идэвхтэй албан бус харилцаатай ажээ.

Эх сурвалж: EURO NEWS
Б.ЖАРГАЛ