ОХУ-ын Ерөнхийлөгч Владимир Путин Москваг Зеленскийтэй уулзах хамгийн тохиромжтой газар хэмээн нэрлэв.

Тэрбээр Дорнын эдийн засгийн форум (ВЭФ)-ын нэгдсэн хуралдааны үеэр "Хэрэв хэн нэгэн үнэхээр бидэнтэй уулзахыг хүсэж байгаа бол бид бэлэн байна. Уулзалт болоход хамгийн тохиромжтой газар бол Оросын Холбооны Улсын нийслэл, баатар хот Москва юм" гэж мэдэгджээ.

Путин мөн Зеленский болон Украины төлөөлөгчид Москваг зорихоор шийдвэл Орос улс тэдний аюулгүй байдлыг хангах баталгаа өгөхөд бэлэн буйг онцлон тэмдэглэсэн байна. Үүнээс гадна тэрбээр Киевийн санал болгож буй байршлуудад уулзалт хийх тухайд санал нийлэхгүй байгаагаа хэлжээ.

Путин өмнө нь БНХАУ-д хийсэн айлчлалынхаа дараа хэвлэлийн бага хурал дээр Зеленскийг Москвад урьж уулзахад бэлэн гэдгээ мэдэгдсэн. Гэвч Зеленский Францын Ерөнхийлөгч Эммануэль Макронтой хийсэн хамтарсан хэвлэлийн хурлын үеэр энэ саналыг хүлээн авахаас татгалзсан байна.

Дорнын Эдийн Засгийн Х Форум есдүгээр сарын 3-наас 6-нд Владивосток хотод болж буй юм. Форумын гол сэдэв: "Алс Дорнод: Энх тайван ба хөгжил цэцэглэлтийн төлөөх хамтын ажиллагаа" аж. Энэхүү арга хэмжээг "Росконгресс" сан зохион байгуулж байгаа бөгөөд ТАСС агентлаг форумын албан ёсны мэдээллийн түншээр ажиллаж буй юм байна.

Эх сурвалж: TASS
Б.ЖАРГАЛ