-ГЭМТ ХЭРГИЙН ШИНЖТЭЙ ҮЙЛДЭЛ БҮРТ ХАРИУЦЛАГА ТООЦОХ ЁСТОЙ-

Ардчилсан Намаас сүүлийн үед үүсээд буй асуудлын талаар мэдээлэл хийлээ. Тус намаас АН-ын дарга байсан Ерөнхий сайд асан Н.Алтанхуяг, АН-ын гишүүн байсан Ж.Батзандан нарыг гүтгэлэг тараасан хэмээн мэдэгдсэн юм. Ардчилсан нам 60 тэрбумын асуудалд тодорхой байр сууриа илэрхийлсээр ирсэн.

Мөн Жижиг дунд үйлдвэрлэлийг хөгжүүлэх сангаас албан тушаалаа урвуулан ашиглаж зээл авсан асуудал, “Эрдэнэт үйлдвэр” ХХК-ийн 49 хувийн хувьчлал болон 51 хувийг эрх баригч МАН-ын нэр бүхий гишүүдийн хамгаалалт дор барьцаанд тавьсан зэрэг хэргүүдийг шүүхээр шийдвэрлүүлэн хариуцлага тооцох хэрэгтэй гэсэн байр сууриа тухайн мөч бүрт илэрхийлж байсан. Гэтэл энэ бүхэнд АН холбоотой мэтээр ярьж байгаа нь үнэнд нийцэхгүй асуудал гэлээ.

АН-ын Ерөнхий нарийн бичгийн дарга Ц.Туваан “Мөн эрх баригчдын зүгээс АН төрийн ажил хийлгэхгүй байна гэдэг мэдээллийг үе үе хийдэг. Төрийн эрх баригч намд бүх эрх мэдэл байгаа. АН 1990 оны хувьсгал болон 1992 оны Үндсэн хуулийг батлуулсан улс төрийн хүчний хувьд ардчилал, хүний эрх, эрх чөлөө, гурав дахь хөрш гэсэн нийгмийн суурь үнэт зүйлээ хамгаалахын төлөө хатуу зогсох бөгөөд шүүхээр гэм буруутайг нь тогтоож, хариуцлага хүлээлгэх ёстой гэсэн байр сууриа дахин илэрхийлж байна” гэв.

АН-ын нарийн бичгийн дарга О.Магнай “Өнөөдөр манай нам УИХ-д долоон суудалтай. Тиймээс гэмт шинжтэй үйлдлийг АН хамгаалж, хаацайлах боломж байхгүй. МАН өнөөдөр албан ёсоор 64, албан бусаар 66 суудалтай болсон. Ийм олон суудалтай улс төрийн хүчин өнөөдөр ажил хийж болохгүй байна гэж ярьж байвал Монголд хэн ажил хийж чадах вэ гэдэг асуудал зайлшгүй тавигдана. Эрх баригч У.Хүрэлсүх дарга ажлаа хий. Сар бүр хэвлэлээр ярьдаг шигээ шударга ёсоор тогтоо. Шударга ёс нэрийн дор хий хоосон популизм хийж, нийгмийн эмзэг цэг дээр давс цацаж хоосон улс төр хийх хэрэггүй гэдгийг сайн ойлгох ёстой. Гэмт хэргийн шинжтэй ямар ч үйлдэл байсан хариуцлага тооц гэдэг мэдэгдлийг бид гаргаж байна. Бүлгийн дарга хийж байгаа Д.Эрдэнэбаттай холбоотой байр суурь байсан, АН-ын дарга С.Эрдэнэтэй холбоотой мэдээлэл байгаагүй. Хэрэв тухайн үед гэмт хэргийн шинжтэй үйлдэл хийсэн бол хэн ч байсан хариуцлага тооц. АН-ын гишүүн гээд бид өмгөөлөхгүй, хариуцлага тооц. АН-ын дарга байна уу, цэрэг байна уу, жирийн гишүүн байна уу хамаагүй, шударга ёсыг талд бид байх болно. АН ямар ч хулгай, луйврыг хамгаалахгүй, ард түмний эрх ашгийг нэгт тавих болно” гэлээ.

-Монголын Зэс корпорацийн Эрдэнэт үйлдвэрийн 49 хувийг худалдаж авсан үйл явдалд танай нам ямар байр суурьтай байгаа вэ?

-Засгийн газрын хуралдааны тэмдэглэлийг нууцын зэрэглэлээс гаргалаа гэх мэдээлэл цацагдсан. Үүнээс таван цагийн дараа нэвтрүүлэг цацагдсан. Манай нам та бүхэнтэй яг адилхан энэ хэмжээний мэдээлэлтэй байна. Түүнээс харахад гэмт хэргийн шинжтэй үйлдлүүд харагдсан гэж үзэж байгаа.

-Эрдэнэт үйлвэрт зургаан сарын хугацаатайгаар онц байдал зарлачихлаа. Гэтэл үймээн самуун дэгдсэн тохиолдолд онц байдал зарлах хуулийн заалттай байдаг. Энэ тал дээр ямар байр суурьтай байна вэ?

-Сүүлийн үед ЗГХЭГ-ын дарга цагдаа, хууль, шүүхийн ажлыг хийгээд байна. Л.Оюун-Эрдэнэ гэмт хэргээр дагнан ажиллах хүсэлтэй бол ЦЕГ-ын дарга эсвэл Улсын ерөнхий прокурор болгомоор дүр зураг харагдаж байна. Хэн нэгэн албан тушаалтан орой бүр хүмүүсийг яллаж болохгүй. Шүүхээр гэмт хэрэг хийснийг тогтоогоогүй байхад ингэж яллаж болохгүй. Яллах ажил Л.Оюун-Эрдэнэд их зохиж байх шиг байна. Тиймээс эрх баригч нам Л.Оюун-Эрдэнийг АТГ, УЕП-ын даргаар тавьбал дээр харагдаж байна.

-Засгийн газрын үйл ажиллагааг юу гэж дүгнэж байна вэ?

-МАН-ын амлалт өнгөрсөн хугацаанд биелээгүй. Хоёр Засгийн газраа сольж, БСШУС-ын, ЗТХ-ийн сайдыг дөрвөн удаа томилоод байна. МАН амлалтаа биелүүлээгүй, гэвч харамсалтай нь орой бүр популизм хийж, хэн нэг хүний хөөсрөл рүү анхаарал хандуулж байна. Хамт казино тоглодог найзаа УИХ-ын даргаар томилж, дүүгээ ЗГХЭГ-ын даргаар болгочихоод У.Хүрэлсүх өөрийгөө "шүдгүй" гэж болохгүй. Хамгийн хурц шүд У.Хүрэлсүхэд байна. АН ажил хийлгэхгүй байна гэж ярьж байгаа нь эрх баригчдын зүгээс туйлын хариуцлагагүй мэдэгдэл. Хийх ажил их байхад үндсэн ажлаа хийхгүй байна.

Ерөнхий сайд асан Н.Алтанхуягийн хийсэн мэдэгдлийн талаар, "Н.Алтанхуягтай үл ойлголцсон асуудал байхгүй. Тэр хүн л буруугаар ойлгосон юм шиг байна. Н.Алтанхуяг намын даргын сунгаанд оролцож ялагдчихаад би ялагдвал бид бүгд ялагдана гэсэн байр сууриар өш хонзонгийн байдлаар хандаж байгаад АН-ын олон зуун жирийн гишүүд харамсаж байгаа. Удахгүй хийсэн мэдэгдлийнхээ төлөө АН-ын гишүүдээс уучлалт гуйх байх гэж итгэж байна"

ГЭРЭЛ ЗУРГИЙГ: Ц.БАЗАРРАГЧАА