Польшийн Торун хотод хөнгөн атлетикийн мастеруудын Дэлхийн аварга шалгаруулах тэмцээн гуравдугаар сарын 24-30-ны өдрүүдэд боллоо. Монгол Улсын баг тамирчид өргөн бүрэлдэхүүнтэй оролцож, дөрвөн алт, дөрвөн мөнгөн медальтайгаар тэмцээнээ өндөрлүүлэн дөнгөж сая эх орондоо ирлээ. Амжилт гаргасан баг тамирчдыг үр хүүхэд хамаатан садан, дүү нар, нутгийн зон олон, Кёкүшүзан Д.Батбаяр болон хэвлэл мэдээллийн байгууллагуудын төлөөлөл хүлээн авлаа.

Монгол Улсын тамирчдаас 85 настай Ц.Раднаа бахдам сайхан амжилтыг гаргаж өнгөрсөн амралтын өдрүүдэд ард түмнээ омогшуулж, огшоосон. Тэрбээр 400 метрийн зайд аваргын алтан медалыг хүртэж, дэлхийн рекорд амжилтыг шинэчлэн тогтоосон юм. Япон, Герман, Их Британи, АНУ-ын тамирчдыг ардаа орхин аваргын алтан медалыг хүртсэн түүнээр бахарахгүй байхын аргагүй билээ. Түүний дараагийн амжилт 60 метрийн саадтай уралдаанд үргэлжилж, Итали, АНУ-ын тамирчдыг ялж алтан медалиа ихэрлүүлсэн. Тэмцээний сүүлийн өдөр уртын харайлтын төрөлд 6.80 метрийн амжилтыг үзүүлж, төрийнхөө дуулалыг гурвантаа эгшиглүүлсэн.

Бид баг тамирчдын буух онгоцыг хүлээх зуураа эхнэр А.Пүрэвийн сэтгэгдлийг сонслоо “Монголын ард түмэн, хүүхдүүдийнхээ тус дэмээр хань минь өнөөдрийн энэ амжилтыг гаргалаа гэж бодож байна. Маш их баярлаж сууна. Амжилт нь ахиж, медалийн тоо нь ихсэх тусам баярлаж л суулаа. Баярлаад хэлэх үг олдохгүй юмаа. Монгол түмний минь буян заяа түшиж тэмцээндээ амжилттай сайн оролцоод ирлээ. Та бүхэндээ маш их баярлалаа” гэв.

-88 ОРНЫ 500 ГАРУЙ ТИВ ДЭЛХИЙН ТАМИРЧДТАЙ УРАЛДАЖ ХҮЧЭЭ СОРИОД ИРЛЭЭ-

Ингээд төд удалгүй ахмад тамирчин Ц.Раднаа онгоцны буудалын хүлээлгийн танхимд цугларсан хүмүүсийн алга ташилтан дор энгэртээ гурван алтан медалиа гялалзуулан гараа далласаар гарч ирсэн юм. Бид түүний сэтгэгдэлийг сонсоход “Ард түмэндээ баярлалаа, намайг ингэж сайхан хүлээж авсан сэтгэл их хөөрч байна. Би 30 гаруй жил хөнгөн атлетикийн спортоор хичээллэсэн. Мэргэжлийн биеийн тамирын багш хүн байгаа юм. Тэмцээнийнхээ бэлтгэлийг Улаанбаатар хотод хийсэн. Бэлтгэл сайхан болсны үндсэнд 88 орны 500 гаруй тив дэлхийн тамирчдтай уралдаж хүчээ сорилоо. Амжилт гаргасандаа баяртай байна. Эх орондоо баярлаж байна. Өмнөговь аймгийн нутгийн зон олондоо баярлалаа. Манай нутгийн хөнгөн атлетикийн спортын төрөлд улсдаа нэлээд дээгүүр байр эзэлж тив дэлхийд нэр алдраа цуурайтуулж яваа олон тамирчид бий. Би арван хүүхэд төрүүлж өсгөсөн бүгдээрээ эрүүл саруул сайхан өсч энх тунх сайхан амьдарч байна” хэмээн сэтгэгдлээ хуваацлаа.

Гэрэл зургийг Г.БАЗАРРАГЧАА