Японы мэргэжлийн сүмо бөхийн Их аварга Хакүхо М.Даваажаргал Монгол улсын иргэншлээс татгалзах өргөдлөө Ерөнхийлөгчийн Тамгын газар өнгөрсөн долоо хоног өгсөн тухай мэдээлэл цацагдаад байна.

Тэрбээр 2020 оны Токиогийн олимпийг нээхийн тулд ийм шийдвэр гаргасан талаар эх сурвалжууд мэдээлж буй юм. Их аварга Японы иргэн болсноор өөрийн нэрээр дэвжээ байгуулж, Сүмогийн холбоонд ажиллах эрх нь нээгдэх билээ. Зодог тайлсаныхаа дараа өөрийн гэсэн дэвжээ байгуулахын тулд ийм шийдвэр гаргасанаа “Монгол тулгатны 100 эрхэм” нэвтрүүлэгт Асашёорюү Д.Дагвадорж аваргатай хамт сууж байхдаа хэлж байсан удаатай.

Харин Хакүхо М.Даваажаргалын ээж Ө.Тамир хүүгийнхээ энэ шийдвэрийг мэдээгүй, сүүлд утсаар ярихад энэ талаар огт дурсаагүй хэмээн мэдээлж байгаа юм байна. Түүнчлэн Япон улсын хэвлэл мэдээллийн хэрэгслүүдээр түүнийг иргэншлээ солих гэж буй талаар мэдээлэл гараагүй байгаа ажээ. Сумо бөхийн дэвжээний багш болсон манай Цэвэгням, Дашням болон Хавайн арлын бөхчүүд энэхүү замналаар явсан байдаг юм гэж спортынхон онцолж байна.

Дашрамд дуулгахад, энэ сарын эхээр Сүмо бөхийн холбооны Ёкозүнагийн /Аваргын/ зөвлөлөөс их аварга Хакүхо М.Даваажаргалд шийтгэл оноох шийдвэрийг гаргаж байсан. Учир нь, өнгөрөгч гуравдугаар сард Осака хотод болсон Хаврын тэмцээнд их аварга Хакүхо 15 даваатай түлүүлснээр 42 дахь түрүүгээ хүртсэх үеэрээ түүнийг сүмогийн ордонд цугласан үзэгчдийг алга ташин, уухайлуулсан нь шийтгэл авах шалтгаан болж байв. Ёкозүнагийн зөвлөлөөс “Сүмод ийм ёслол хийх ёсгүй” гэсэн тайлбарыг өгч уламжлал ёсоо хадгалж үлдэхийн тулд зүгээр орхиж болохгүй гэсэн байдаг.

Эл явдлын дараа Япон улсын сэтгэл судлаачид “аав нь тэнгэрт дэвшээд удаагүй байгаатай холбогдуулан түүний сэтгэл зүйг тогтворгүй байгаа” хэмээн тайлбарлаж байсан удаатай юм байна.