ЗГХЭГ-ын дарга Л.Оюун-Эрдэнэ хордлогод орж, БНСУ руу эмчилгээнд явсан гэх мэдээлэл гарсан. Түүний тэргэнцэрт сууж бусдаар түрүүлсэн байдалтай Инчоны нисэх онгоцны буудалд явж буй зураг олон нийтийн сүлжээнд тарсан.

Энэ талаараа Л.Оюун-Эрдэнэ сайд “Хоолны хордлогыг эмчлүүлж байсан ч хөлөнд нөлөөлсөн. Мөн идээт үрэвсэл болсныг мэдэлгүй цаг алдсан байна. Солонгост яаралтай жижиг мэс засалд орсон” гэх тайлбарыг хийсэн юм.

Түүний хэлсэн энэ үг олон нийтийн шүүмжлэлд өртөөд байгаа юм. Тодруулбал, иргэд түүнийг худлаа ярьсан хэмээн дүгнэж хоолны хордлого хөлөнд нөлөөлнө, нөлөөхгүй гэх маргааныг дэгдээгээд байна. Тэгвэл бид уг асуудлыг Нарийн мэргэжлийн эмч Н.Гэрэлмаагаас тодруулав.

-Хоолны хордлого хүндэрч хөлөнд нөлөөлөх үү?

-Хоолны хордлого хөлөнд нөлөөлөхгүй. Харин тухайн хүн сахартай бол цусан хангамж дутагдсанаас болж хөлөнд нөлөөлнө. Сахараас болж л хөл өвддөг. Ерөнхийдөө хэвийн хэмжээнээс илүү жинтэй, цусан төрлийн садан дотор нь энэ өвчнөөр өвдөж байсан хүн байх, архи тамхины хэрэглээ их, нойр булчирхайн архаг үрэвсэлтэй, цусны даралт ихсэх зэргээс шалтгаалж сахарын шинж тэмдэг илэрдэг. Түүнээс ходоодны өвдөлт хөлөнд нөлөөлөхгүй. Сүүлийн жилүүдэд сахар буюу чихрийн шижин өвчнөөр өвчлөгсдийн тоо нэмэгдэх хандлагатай байгаа .

-Манай улсын хүн амын хэдэн хувь нь сахартай байна вэ?

-Дэлхийн эрүүл мэндийн байгууллагаас гаргасан судалгаанд Монголын нийт хүн амын 10 орчим хувь нь чихрийн шижинтэй гэх дүн гарсан. Чихрийн шижин өвчнөөс болж жилдээ 240 гаруй хүн хорвоогийн мөнх бусыг үзүүлдэг гэсэн тоо баримт байдаг. Чихрийн шижинтэй хүн хоолны дэглэм сайн барих хэрэгтэй. Буруу хоололсноос үүдэн сахарын хэмжээ нэмэгдэнэ.

-Чихрийн шижинтэй хүнд ямар шинж илэрдэг вэ?

Чихрийн шижингээс болж хараа муудах, бөөрний дутагдалд орох, хөлийн шархтай болох улмаар хөлөө тайруулахад хүрдэг. Цусан дахь сахарын хэмжээ ихсэж бөөр, нүдний хараа, болон захын тэжээгч судаснууд хамгийн түрүүнд гэмтэж эхэлдэг. Мөн зүрх, элэг гэх мэт цуллаг эрхтнүүдийг гэмтээдэг. Гар хуруу шалбарсан тохиолдол эдгэх нь удаан байдаг.

• ЗГХЭГын дарга хоолны хордлого хүндэрч хөлд нь нөлөөлсөн гэж мэдээлэл өгсөн. Түүний тайлбарыг сонсоод ямар сэтгэгдэл сонссон бэ .

- Тухайн хүнийг би үзэж, оношилсон эмч биш болохоор сайн мэдэхгүй байна. Гэхдээ хоолны хордлого хөлөнд нөлөөлөхгүй. Чихрийн шижинтэй бол хүндрүүлсэн байж болзошгүй. Тэгэхээр та өөрөөс нь чихрийн шижинтэй үгүйг нь асуугаарай.

С.ПҮРЭВДОРЖ