С.Зориг агсныг хөнөөсөн хэргийг шалгахдаа Т.Чимгээ, Б.Содномдаржаа нарыг эрүүдэн шүүсэн гэх үндэслэлээр ТЕГ-ын дарга асан Б.Хурц нарын хүмүүсийг ЦЕГ-ын Тусгай субьектыг шалгах хэлтэсээс шалгаж байгаа. Тодруулбал, ТЕГ-ын дарга асан, хошууч генерал Б.Хурц нартай хамт УЕП-ын орлогч прокурор Г.Эрдэнэбат, ТЕГ-ын нууцын зэрэглэлтэй мөрдөгч Ж.Мөнхгал, С.Баяр, О.Бархасбадь, О.Бямбажав, Шүүхийн шийдвэр гүйцэтгэх ерөнхий газрын хоёр ажилтан /тэд эрүүдэн шүүлт явагдсан гэх өдөр ээлжинд гарч байсан/ нарын есөн хүнийг шалгаж дуусаад Нийслэлийн прокуророос яллах дүгнэлт үйлдэн Төв аймгийн Эрүүгийн хэргийн анхан шатны шүүхэд шилжүүлсэн. Өчигдөр тус хэргийн шүүх хурлын урьдчилсан хэлэлцүүлэг болж, гэм буруугийн шүүх хурлыг энэ сарын 23-ны 10.00 цагт хийхээр товложээ.

Т.Чимгээ, Б.Содномдаржаа нар С.Зориг агсаны амь насанд хүрсэн ч, хүрээгүй ч бай дээрх нэр бүхий хүмүүс хүний эрхийг зөрчиж, эрүүдэн шүүлт тулгасан нь байж боломгүй үйлдэл билээ. Тиймээс Монголын шүүх үнэхээр л шударга бустай тэмцэж чаддаг, шударга бусын эсрэг шийдвэр гаргаж чадаг бол эдгээр хүмүүст хариуцлага хүлээлгэх нь зүй ёсных байх ёстой гэж олон нийт үзэж байна.

Улс эх орны амин чухал гэрээ хэлэлцээрээс авахуулаад улс орны эрх ашгийг ноцтой хохироодог дарга нар, улс төрийн хүрээнийхнийг хорьдог, шалгадаг, эцэст нь хэргийг нь хэрэгсэхгүй болгодог, иргэдэд шударга дүр харуулж хуурдаг энэ байдал дахин давтагдах ёсгүй. Тиймээс цаашдаа гэм буруутай нь ялаа үүрээд явдаг шударга ёс тогтоохыг ард түмэн шаардаж байна. Шүүхийн шийдвэр ардын хүү, авлигач улс төрчдөд ижил үйлчилдэг эсэхийг дээрх хүмүүсийн хэргийг хэрхэн шүүхээс харах нь.

-Б.ХУРЦ Т.ЧИМГЭЭ, Б.СОДНОМДАРЖАА НАРЫГ ЭРҮҮДЭН ШҮҮЛТИЙГ УДИРДСАН УУ-

Тагнуулын ерөнхий газрын дарга асан, генерал Б.Хурцыг Эрүүгийн цагдаагийн албанаас С.Зоригийн амь насыг хөнөөсөн хэргээр ял эдэлж буй Т.Чимгээ, Б.Содномдаржаа нарыг эрүүдэн шүүсэн, мөн хууль тогтоомж зөрчсөн гэх хэрэгт холбогдуулан өнгөрсөн дөрөвдүгээр сарын 23-нд саатуулсан. Улмаар тавдугаар сарын 23-ны өдөр сулласан байдаг. Тодуулбал хэн гэдэг шүүгч, прокурор, мөрдөгч, хохирогч, гэрч, шинжээч, гэмт хэрэг хамтран үйлдсэн хүнийг дарамталсан, сүрдүүлсэн, эсхүл тэдгээрийн болон өөрийн амь нас, эрүүл мэндэд аюул учруулсан гэх баримт мэдээг шүүхэд ирүүлээгүй учраас түүнийг хорих шаардлагагүй гэж Чингэлтэй дүүргийн Эрүүгийн хэргийн анхан шатны шүүхээс үзсэн. Түүнд холбогдох хэргийг Авлигатай тэмцэх газар болон Цагдаагийн ерөнхий газрын Эрүүгийн цагдаагийн албаны хамтарсан ажлын хэсэг шалгаж буй юм.

Б.Хурцыг төрийн албанд олон жил ажилласан, мэргэжлийн өндөр ур чадвартай, Удирдах ажлын дадлага туршлагатай, гадаад хэлний мэдлэгтэй тул улс орноо төлөөлөн ажиллах өндөр хариуцлагатай, нэр хүндтэй албыг хаших бүрэн боломжтой гэж үзэж БНСУ-д элчингээр томилох гэж байсныг чуулганы хуралдаанаар хэлэлцэж болиулсан байдаг. Б.Хурц 1969 онд төрсөн. 50 настай, эхнэр дөрвөн хүүхэдтэй. Эдийн засаг, эрхзүйч мэргэжилтэй. 1992-2000 онд “Торгоны зам” ХХК-д менежер хийж ажлын гараагаа эхэлж байсан байх юм.

-Г.ЭРДЭНЭБАТ ЭНЭ ХЭРГИЙН ЖИНХЭНЭ АЛУУРЧНЫГ ОЛСОН ГЭДЭГТЭЭ ИТГЭЛТЭЙ БАЙДАГ-

Г.Эрдэнэбат бол С.Зориг агсны амь насыг хөнөөсөн хэргийн гүйцэтгэгчийг илрүүлэхэд ажлын хэсгийн ахлагчаар ажилласан Улсын ерөнхий прокурорын орлогч, Төрийн хууль цаазын Шадар зөвлөх асан. Түүнийг Ерөнхийлөгч зарлиг гаргаж өнгөрсөн гуравдугаар сарын 28-нд үүрэгт ажлаас нь чөлөөж, орон нь Б.Жаргалсайханыг томилсон. Г.Эрдэнэбат Завханы гаралтай. Хууль зүйн сайд асан Х.Тэмүүжингийн найз ойрынх нь хүмүүсийн нэг гэх.

Энэ хүн С.Зориг агсаныг алсан жинхэнэ алуурчдыг баривчилсан гэдэгтээ бүрэн итгэлтэй байдаг хүн. Тиймдээ ч хэвлэлд ярихдаа “Өнөөдөр хүмүүс энэ хэргийг илэрсэн шалтгаан нь нэг ялтан мэдээлэл өгөнгүүт бүх зүйл ар араасаа ундарсан юм шиг ташаа ойлгоод байгаа юм. Тийм биш гэдгийг онцолж хэлмээр байна. Ажлын хэсгийнхэн энэ хэрэгт олон жил, сарын турш цаг зав, сэтгэл зүрхээ зориулж, байдгаараа хичээсэн. Асар олон хүний хүч хөдөлмөр итгэл үнэмшил зүтгэл орсон. С.Зориг агсны амь насыг хөнөөсөн хэргийг шалгаж байгаа ажлын хэсэгт төрөөс анхаарал хандуулж, хэргийг шалгахад шаардлагатай хөрөнгөний асуудлыг бүрэн шийдвэрлэж өгсөн. Хэргийг шалгаж байгаа мөрдөгчид хөдөө томилолтоор явж, шаардлагатай хүнээс тайлбар авах гэхээр зардал мөнгө, унаа тэрэгний асуудал хүнд байсаар ирсэн. Харин хөрөнгө мөнгөний асуудал шийдэгдсэн болохоор хөдөө орон нутаг төдийгүй гадаадын улс орон руу шинжилгээ явуулсан. Сэжигтэй хүмүүсээс гадаадад очиж тайлбар мэдүүлэг авсан гээд олон ажиллагаа хийгдсэн. 1998 оноос өгөгдсөн мэдээлэл болгоны араас явж шалгасан. 65 хавтаст хэргийг ямар зүйлээр дүүргэсэн байх вэ. Энэ болгоныг нарийвчилж шалгасан. Сэжиг бүхий нэг хүний мэдээлэл нотлогдсон. Эндээс хэргийн зангилаа тайлагдаж, баримт болгон нь нотлогдсоор хэргийн гүйцэтгэгчдийн үйлдсэн хэрэг илэрсэн.” Гэсэн байдаг.

Харин ТЕГ-ын нууцын зэрэглэлтэй мөрдөгч Ж.Мөнхгал, С.Баяр, О.Бархасбадь, О.Бямбажав, Шүүхийн шийдвэр гүйцэтгэх ерөнхий газрын хоёр ажилтны хувийн мэдээлэл хийгээд гэрэл зураг олдохгүй байна. Нууцын зэрэглэлтэй мөрдөгчид нууц л байдаг бололтой.