МСНЭ-ийн ерөнхийлөгч Х.Мандахбаяр мэдээлэл хийлээ.

Тэрээр “Сэтгүүлчдийн онц их хурал нэрээр зохион байгуулалттай гүтгэлэг үйлдсэн. Иргэн Н.Нарангэрэлтэй намайг холбож, тэр 19 настай охин миний хүүхдийг төрүүлсэн гэдэг гүтгэлгийг “ТВ4” телевизийн захирал Алтаншагай, сэтгүүлч Баяржаргал, “Хатуу мэдээ” сайтын найруулагч Мөнхтөр нар зохион байгуулж, бусдыг дарамталж, хэвлэл мэдээллээр цацан миний нэр хүндэд халдахыг санаархсан. Энэ бол маш тодорхой гэмт хэрэг. Иргэн Н.Нарангэрэл хэвлэлд өгсөн ярилцлагадаа эдгээр хүмүүс нийлээд өөрийг нь Мөнгөөнөө гэдэг хүнээр хөлсөлж авсан гэж мэдүүлсэн. Харин намайг гүтгэсэн хүмүүс мэдээлэл хийхдээ тэр хүн өөрөө бидэнд мэдээлэл өгсөн гэж хэлсэн.

Энэ асуудал хуулийн байгууллагаар шалгагдана

Миний нэр төрд халдаж, гутаан доромжилж, нийгэмд эзлэх байр суурийг минь үгүйсгэх ийм оролдогууд нь маш ноцтой гэмт хэрэг. “Хатуу мэдээ” гэх сайтын Мөнхтөр намайг нэг бус удаа гүтгэж, доромжилсон. Одоо сүүлдээ гэр бүл, үр хүүхэд рүү минь хүртэл халдах боллоо. Энэ бол маш том гэмт хэрэг. Үүнийг хуулийн байгууллагаар тогтоолгоно.

Зөвхөн долоо хоногийн дотор “ТВ4” телевизтэй холбоотой дөрөв таван гомдол над дээр ирсэн. Шүүхийн шийдвэр нь гарчихсан, дандаа гүтгэлэг доромжлолтой холбоотой. Гэтэл үүнийхээ төлөө ямар ч хариуцлага хүлээдэггүй. “Хатуу мэдээ” гэдэг сайт нь ч ялгаагүй. Бөөн гүтгэлэг, доромжлолтой холбоотой гомдол. Энэ сэтгүүл зүй биш. Би эдгээр хүмүүсийг сэтгүүлч, сэтгүүлзүйн салбарынхан гэж үзэхгүй байна.

Сэтгүүлчдийн онц их хурал гэгч нь мөн л зохион байгуулалттайгаар намайг унагах гэсэн оролдлого. Эдний гүтгэлэг зогсолтгүй үргэлжилж байна. “Сэтгүүлч” ордныг Хятадын ССТV-ийнх л гэнэ, Хятадад ярилцлага авахын тулд Х.Мандахбаяраас зөвшөөрөл авдаг гэх мэтээр гүтгэсээр л байна.

Улмаар МСНЭ-ийг ч хууль бус, намайг МСНЭ-ийг худалдаж авсан гэж Орон нутгийн сэтгүүлчдийн холбооны дарга Шаравдорж гэж хүн гүтгэдэг. МСНЭ-ийг сонгох хурал хуулийн дагуу болсон. Хуралд оролцсон хүмүүсийн 85 хувийн саналаар би сонгогдсон. Ямар ч хууль бус зүйл болоогүй. Гэтэл Онц их хурал гэгч зүйл гаргаж ирээд намайг унагах гэж оролдож байна.

Би албан тушаалтай зууралддаггүй. Гэхдээ одоо хуультай зууралдана. Энэ МСНЭ-ийн муу, муухайг нь илчилж, идээ бээрийг нь шахаж гаргана” гэж мэдэгдэв.

Харин хэвлэлийн хурлын үеэр “Хатуу мэдээ” сайтын найруулагч Мөнхтөр, яруу найрагч Б.Галсансүх болон “ТВ4” телевизийн сэтгүүлч Баяржаргал нар ирсэн бөгөөд түүний байр суурийг үгүйсгэж байлаа.

“Хатуу мэдээ” сайтын найруулагч Мөнхтөр “Сэтгүүлчдийн нэгдсэн эвлэлийн ерөнхийлөгч хүн олны өмнө сууж байгаад нэг ч түгдрэлгүйгээр худлаа ярьж байгааг анх удаа харж байна. Надад баримтууд байна” гэв.

Харин “ТВ4” телевизийн сэтгүүлч Баяржаргал “Ийм зүйл зохион байгуулах ямар ч өс хонзон санасан зүйл байхгүй шүү дээ, миний хувьд. Энэ эмэгтэй өөрөө хандсан бичлэгүүд хүртэл байгаа. Та яагаад ингэж гүтгээд байгаа юм бэ” гэлээ.