УИХ дахь МАН-ын бүлгийн ээлжит хурлаар ирэх оны төсвийн тухай хууль, НД-ын шимтгэлийн төсвийн тухай хууль, ЭМД-ын сангийн ирэх оны төсвийн тухай хуулиудад Ерөнхийлөгчийн тавьсан хориг болон бусад асуудлыг хэлэлцсэн байна.

МАН-ын бүлгийн дарга Д.Тогтохсүрэн “МАН-ын бүлгийн ээлжит хурлаар гурван асуудлыг хэлэлцсэн. Нэгдүгээрт, 2020 оны Улсын төсвийн тухай хууль, Нийгмийн даатгалын сангийн 2020 оны төсвийн тухай хууль, Эрүүл мэндийн даатгалын сангийн 2020 оны төсвийн тухай хуулиудад Монгол Улсын Ерөнхийлөгчийн тавьсан хоригийг хэлэлцлээ. Хоёрдугаарт, Монгол Улсын Ерөнхийлөгч Өмгөөлөлийн тухай хуульд хориг тавьсан. Энэ хоригийг хэлэлцсэн. Гуравдугаарт, Монгол Улсын Ерөнхий сайд ОХУ-д айлчилсан талаарх Засгийн газрын хоорондын комиссын дарга Шадар сайдын мэдээллийг сонссон. Эхний хоёр асуудалтай холбогдуулж шийдвэр гаргасан. 2020 оны Улсын төсвийн тухай хуультай холбогдуулж Ерөнхийлөгч хориг тавьсан дөрвөн асуудал дэвшүүлсэн. Бүлэг хэлэлцээд 2020 оны Улсын төсөвт тавьсан Ерөнхийлөгчийн хоригийг хүлээн авах боломжгүй гэж үзлээ. Нийгмийн даатгалын сангийн тухай хуульд тавьсан Ерөнхийлөгчийн хоригийг МАН-ын бүлгийн ихэнх нь хүлээн авах нь зүйтэй гэж үзлээ. Харин 2020 онд обьект нь эхлээд 2021, 2022 онд дамжин хэрэгжих обьектыг улсын төсвөөс хасах зүйтэй гэсэн саналыг, мөн ирээдүй өв сангийн тухай хуулийн төслийн нэмэлт, өөрчлөлтөд бүхэлд нь тавьсан хоригийг, Өмгөөллийн тухай хуульд тавьсан хоригийг ч хүлээж авах боломжгүй гэж үзлээ” хэмээн мэдээллэв.