Ханиад томуугийн өвчлөл ихсэж дүүргийн эмнэлгүүд ачааллаа дийлж ядан, эмчлүүлэгчдээ коридортоо хүлээн аваад багагүй хугацааг өнгөрөөж байна. Энэ нөхцөл байдалд хэн бүхэн санаа зовинож байгаа ч салбар яам нь төдийлөн анхаарлаа хандуулахгүй байгаа. Үүнд сэтгэл зовнисон "Макс" группийн захирал Д.Ганбаатар өөрийн цахим хуудсаараа дамжуулан "Эмнэлгийн зориулалтаар ашиглах боломжтой, 500 ор байрлуулж томуугийн улмаас өвдсөн эмчлүүлэгчдийг хүлээн авч ашиглахж болох обьектыг гаргаж, хувь нэмрээ оруулахад бэлэн" гэдгээ жиргэлээ.

Тэрээр "Хөгшид, хүүхдээ тэвэрсэн ээж эмнэлгийн коридорт хэвтэхийг харахаар сэтгэл зовниж байна аа. Хүрэлцэхгүй байгаа эмнэлгийн орны асуудлыг шийдэж, хувь нэмрээ оруулахад манай хамт олон бэлээн. Обьект нь бидэнд байна. 45 хоногийн дотор эмнэлгийн зориулалттай 500 ор бэлэн болгох боломж бий. Мэдээж үйл ажиллагаа, халаалт, дулааны асуудал гээд тодорхой хэмжээнд түрээс, төлбөрийн асуудал яригдах байх. Ханиад томууны дэгдэлт дөрөвдүгээр сар хүртэл үргэлжилнэ. Хэвтэн эмчлүүлж байгаа хүүхдүүдийн 80 хувь нь томуу, томуу төст өвнөөс болж эмнэлэгт хэвтэж байна. Дараа жил дахиад л энэ асуудал яригдах нь ойлгомжтой. Санаачлагыг маань Эрүүл мэндийн салбарынхан анхааралдаа авна биз ээ" гэжээ.