ХӨСҮТ-д энэ оны хоёрдугаар сарын 24-ний байдлаар нийт найман хүнийг тусгаарлан шинжилгээ авч, эмчийн үзлэг хяналтыг хийж байна.

ХӨСҮТ-ийн захирал Д.Нямхүү: “Бид сахилга бат, дэг журамтай байж өгсөн зөвлөгөө зааврыг ягштал биелүүлж чадвал бид аюулт өвчнийг даван гарч чадна. Бусад улс орны хувьд хүн ам олон, нягтаршил ихтэй тул төвөгтэй байдалд байна. Манай улс зөв шийдвэрийг цаг алдалгүй гаргаснаар нөхцөл байдлыг даван гарах боломж бий гэж харж байна. Тиймээс иргэд та бүхэн маань сар шинээр айлаар зочлохгүй, олон хүний газраар явахгүй байхыг хүсэж байна. Өчигдөр буюу хоёрдугаар сарын 23-ны 15:55 цагт БНСУ-аас Инчеон–Улаанбаатар чиглэлийн КЕ-867 дугаартай нислэгээр Тэгү хотоос сүмийн шугамаар ирсэн хоёр, нэг гэр бүлийн дөрөв, нийт зургаан солонгос иргэн, 20:42 цагт Пусан-Улаанбаатар чиглэлийн ОМ 312 дугаартай нислэгээр ирсэн хоолой хөндүүрлэсэн гэх зовиуртай нэг иргэн, Мөн БНСУ-аас өмнө нь ирээд байсан нэг хүнийг тусгаарласан” гэв.

Одоогийн байдлаар Өмнөд Солонгос улсад шинэ коронавирусийн халдвар авсан хүний тоо нэг шөнийн дотор 161-ээр нэмэгдэж өнөөдөр буюу хоёрдугаар сарын 24-ний өглөөний байдлаар нийт 763 тохиолдол бүртгэгдээд байна. Шинээр бүртгэгдсэн 161-н тохиолдлын 115 нь Тэгү хотын сүмийн цугларалттай холбоотой ажээ. Тус сүмийн цугларалтанд оролцсон шинэ коронавирусийн халдвартай 61 настай эмэгтэй нийт 231 вирус халдаасан бол энэ тоо цаашдаа 1200 хүрэх төлөвтэй байгааг эх сурвалжууд мэдээлжээ.