Засгийн газрын шийдвэрээр олон нийтийг хамарсан арга хэмжээ болон Цагаан сарын баярыг олон нийтийн хүрээнд тэмдэглэхгүй байх шийдвэрийг гаргасан. Учир нь манай орны мөнхийн хөрш болох БНХАУ-д шинэ төрлийн COVID-19 коронавирус гарсантай холбогдуулан улс даяар олон нийтийн арга хэмжээг тодорхой хугацаагаар цуцалж, хөл хорио тогтоосон. Болзошгүй эрсдлээс ард иргэдээ хамгаалах, урьдчилан сэргийлэх зорилгоор шилжилт хөдөлгөөнийг хүртэл зогсоож, өндөржүүлсэн бэлэн байдалд хэсэгчлэн шилжин ажиллаж байна. Түүнчлэн сургууль, цэцэрлэгийн үйл ажиллагааг тодорхой хугацаагаар хойшлуулан цахим хэлбэрээр сургалтын үйл ажиллагааг явуулж буй зэрэг салбар бүр урьдчилан сэргийлэх чиглэлээр эрчимтэй ажиллаж байна. Гэвч дэлхий даяар тархсан уг аюулт вирусээс сэргийлж буй одоогийн нөхцөл байдалд Хөдөлмөр, нийгмийн хамгааллын сайд С.Чинзориг эрсдэлтэй бөгөөд хайхрамжгүй шийдвэр гаргасан нь төрийн шийдвэрийн эсрэг гаргасан шийдвэр боллоо.

Тодруулбал, Цагаан сарын өмнөхөн буюу хоёрдугаар сарын 21-нд тэтгэврийн зээлийг зургаа хүртэлх сарын хугацаагаар олгов. Энэ үеэр ахмадууд үүрийн таван цагаас эхлэн дугаарлаж, олон хүний бөөгнөрөлийг үүсгэлээ. Тэрбээр хэлэхдээ, “Ганцхан өнөөдөр /2020.02.21/ тэтгэврийн зээл олгох асуудал явагдана. Маргааш амралтын өдөр учир дуусна. Нээх олон хүн хамрагдаж чадахгүй болов уу гэж бодож байна” гэсэн боловч бодит нөхцөл байдалд тэтгэврийн зээл олгож байсан арилжааны банкуудын салбаруудад хэдэн зуун хүний бөөгнөрөл, дараалал үүссэн байгааг хэвлэл мэдээллийн хэрэгслүүд шууд дамжуулсан билээ. Уг шийдвэр тэтгэврийн зээл авах хүсэлтэй ахмадуудыг эрсдэлд оруулж болохуйц болчимгүй шийдвэр байсан. Учир нь шинэ төрлийн коронавирус нь архаг, хууч өвчтэй болон ахмад настай хүмүүст халдварлахдаа илүү хүнд байдлаар илэрч, вирусын халдвараар нас барах тохиолдлыг нэмэгдүүлж байгааг ДЭМБ болон олон улсын эрүүл мэндийн байгууллагууд анхааруулсаар байгаа юм. Одоогоор Монгол Улсад халдварын тохиолдол бүртгэгдээгүй хэдий ч ийм эгзэгтэй үед хүн амын бөөгнөрөл, цугларалтыг үүсгэсэн нь уг вирус тархах эрсдэл, нөхцөлийг бүрдүүлсэн үйл явдал болсныг харуулав.

САНУУЛАХАД: ХНХ-ын сайд С.Чинзориг хоёрдугаар сарын 21-нд өгсөн мэдээлэлдээ...

“Коронавирусын хөл, хорионы эсрэг арга хэмжээ авсан гэж бодохгүй байна”

-Тэтгэврийн зээлийг Цагаан сарын өмнөхөн олгож эхэллээ. Шинэ төрлийн коронавирусын тархалттай холбоотой Засгийн газар хөл, хорио тогтоох шийдвэр гаргасан байтал зээл олгож байгаа банкууд дээр маш их бөөгнөрөл үүссэн байдал харагдсан. Энэ нь өвчний эсрэг авч хэрэгжүүлж байгаа арга хэмжээний эсрэг арга хэмжээ биш үү? Цагаан сарын дараа яагаад зээлээ олгож эхэлсэнгүй вэ?

- Би бол коронавирусын хөл, хорионы эсрэг арга хэмжээ авсан гэж бодохгүй байна. Зургаан сарын хугацаатай тэтгэврийн зээлийг хожуу гаргая гэж нэлээн бодсон. Яам болон Засгийн газарт ахмадуудын зүгээс “Тэтгэврийн зээлийг хэзээ олгох вэ, тэтгэврийн зээлийг олгооч ээ” гэдэг хүсэлт, шаардлагууд маш их ирсэн учраас энэ оны хоёрдугаар сарын 20-ноос эхлэн тэтгэврийн зээл олгох арга хэмжээг эхлүүлэх чиглэлээр арилжааны банкуудтай ярьсан. Ахмадууд оочер, дараалал үүсгэхгүйгээр, өөрсдийгөө эрсдэлд оруулахгүйгээр амны хаалтаа зүүж, халдвараас урьдчилан сэргийлэх арга хэмжээг аваад зохион байгуулах байх гэж бодож байна. Ганцхан өнөөдөр /2020.02.21/ тэтгэврийн зээл олгох асуудал явагдана. Маргааш амралтын өдөр учир дуусна. Нээх олон хүн хамрагдаж чадахгүй болов уу гэж бодож байна. “Хаан банк”, “Төрийн банк” хоёр голлож байгаа. Нийт тэтгэвэр авагчдын 95 орчим хувь нь тус хоёр банкаар үйлчлүүлж байгаа учраас ачаалал их ирнэ. Бусад жижиг арилжааны банкууд дээр нийт тэтгэвэр авагчдын таван хувь нь үйлчлүүлдэг учир ачаалал үүсэхгүй байх. Та бүхэнд хэлэхэд нөхцөл нь адилхан байгаа. 70/30 гэсэн харьцаагаараа тэтгэврээ олгож байсан. Сарын 1,4 хувийн хүүтэй тэтгэврийн зээлийг олгоод явна. Өмнө нь зээлийн хүүг бууруулах нь зөв гэсэн шаардлага их ирдэг байсан учир Нийгмийн даатгалын хөрөнгийн тодорхой хэсгийг бага хүүтэйгээр арилжааны банкуудад байршуулах замаар зээлийн хүүг бууруулах арга хэмжээг авч байсан. Энэ удаа Засгийн газар “Хүү бууруулах асуудалд оролцохгүй. Арилжааны банкны бүтээгдэхүүн учраас уг зарчмаараа явах нь зүйтэй” гэсэн. Ингэж арилжааны банкууд болон Монголбанктай харилцан зөвшилцсөн. Монголбанкны Ерөнхийлөгчийн хувьд хүүгүй гурван сарын урьдчилгаатай тэтгэврийн бүтээгдэхүүн гаргаж болно гэдэг зүйлийг ярьж байгаа. Одоогоор арилжааны банкуудтай харилцан ойлголцож чадаагүй байгаа учраас Цагаан сарын дараагаар хүүгүй, тодорхой хэмжээний хураамжтай гурав хүртэлх сарын тэтгэврийн урьдчилгаа бүтээгдэхүүн байх уу гэдэг асуудлаар ярилцана” гэжээ.

НӨХЦӨЛ БАЙДАЛ: Тэтгэврийн зээл авахаар дугаарлан зогсох ахмадууд (2020.02.21)