-Эрдэнэт хүний алтан амь гэдэг эргэж олддоггүй ганцхан учир ганц ч болтугай маскгүй хүнийг гадуур явахгүй болтол нь торгоё-

Дэлхий нийтийг айлгасан аймшигт цар тахлын халдвар өдрөөс өдөрт ихдэж ихэссээр байна. Коронавирусийн халдвараар өчигдрийн байдлаар гуч дөчин оронд наян хоёр мянга гаруй хүн өвчилж, нас барсан хүний тоо бараг гурван мянгад хүрлээ. Агаар дуслын замаар халдварладаг энэ аймшгийн өмнө хүн төрөлхтөн үнэндээ цөхөрч байна. Эдгээдэг эм тариа гэж одоо болтол гараагүй байна. Энэ аюул гуравхан сая хүнтэй манай улсад орж ирвэл монгол үндэстэнд сүйрэл л гэсэн үг. Энэ цар тахлын аюулаас хамгаалах халхавч бамбай ердөө л амны хаалт байгаа. Энэ талаар эрүүл мэндийн байгууллага, Эрүүл мэндийн яам, Дэлхийн эрүүл мэндийн байгууллага, төр засгийн тэргүүнүүд гээд бүгд албан ёсоор ч, аминч ёсоор захьж, зөвлөмж гаргаж байна.

Харамсалтай нь маск зүүгээгүй хүмүүс хаа сайгүй их байна. Гадаа гудманд ч, албан газруудад ч, эргэн тойронд хавтгайдаа нэг амны хаалтгүй иргэд “билчиж” байна. Цул “микробны үүрнүүд” нус цэр, бохир шүлс, нянгаа үсчүүлж явна. Шүлс, амвсгал ямар аймшигтай нян бактерийн тээгч болдгийг ойрын өдрүүдэд төвийн телевизүүдээр гарсан “Ханиад”, “Халдвар” хэмээх кинонуудыг хараад мэдэж авцгаасан л байх. Кино гэдэг олон түмэнд ойлгомжтой хэлээр хүүрнэдэг урлаг. Хүн хэлээрээ, мал хөлөөрөө гэдэг. “Маскаа зүүцгээе” гэж уриалах хүн бол захаас аван олон байгаа. Ачир дээрээ амны хаалтаа зүүцгээсэн нь нүдний гэм шахуу. Амны хаалтгүй иргэдийг нийтийн тээврээр зорчуулахгүй гэсэн журам ч огт мөрдөгдөхгүй байна. Коронавирусийн халдвар ямар аймшигтай хурдаар тархдгийг Солонгос Улсад өвчин тараасан нэг иргэний ухаангүй үйлдэл тодорхой харуулсан. Тухайн хүн аминдаа хайргүй байж болно. Хамгийн гол улс орондоо, зон олонд, хүн төрөлхтөнд гай болохгүй байх нь хүн болж төрсний үүрэг. Тиймээс хүссэн ч, эс хүссэн ч хүн олны дунд амьдарч, ажиллаж, амь зууж, аж төрж, амьсгалж яваа л бол амны хаалт зүүх шаардлагатай байна.

Амны хаалт бол амьсгалын замаар гадагшилж буй халдвар үүсгэгчийг хязгаарлах үүрэгтэй. Өөрөөр хэлбэл амьсгалын замын халдварт өвчин, шинэ коронавирусын халдвараас урьдчилан сэргийлэх, тархалтыг бууруулахад амны хаалт хэрэглэх явдал нэн чухал байгаа. Иргэн бүр амьд явах эрхтэй гэдэг шиг хүн бүхэн агаар амьсгалах байгалиас заяагдмал эрхтэй. Энэ л эрхээ эдлэх гэтэл нийгэмд эрхээ мэддэг ч үүрэг хариуцлагаа ухамсарладаг хүн ховор байгаа нь хэцүү. Өөрийн болон өрөөлийн эрүүл мэндэд тустай хамгийн чухал үйл бол өнөөдрийн байдлаар маск зүүх болчихоод байна. Коронавирусын халдвар агаар дуслын замаар халдварладаг гэж эрүүл мэндийн байгууллагынхан сануулсаар байхад амны хаалт зүүхгүй байна гэдэг нийгмийн хэм хэмжээг зөрчиж буй явдал яах аргагүй мөн. Үнэхээр үхэлд дурлаагүй л бол, хүн төрөлхтөнд гай гамшиг тарих гээгүй бол, мал амьтнаас долоон мангар тэнэг л биш бол маск зүүх л хамгийн бодит тус дэм болчихоод байна. Иймээс амиа бодож маскаа зүүцгээе. Алсаа бодож амь, амьсгалаа хамгаалцгаая. Ард зоноо бодож аргаа ядаж буй төр засгийн шийдвэрээ дагацгаая. Нэг хүний болчимгүй үйлдлээс болж нийтээрээ хохирч болохыг бодоцгооё. Маскаа зүүцгээе, маск зүүгээгүй хэнийг ч бай нийгмээрээ шахацгаая. Эрдэнэт хүний алтан амь гэдэг эргэж олддоггүй ганцхан учир ганц ч болтугай маскгүй хүнийг гадуур явахгүй болтол нь торгоё.