УИХ–ын гишүүдийн бүрэн эрхийн хугацаа дуусгавар болж, дараагийн сонгуулийн босгон дээр ирээд байна. Өнгөрсөн дөрвөн жилийн хугацаанд УИХ-ын гишүүд ямар ажил хийснийг Мэдээ.мн тоймлон хүргэж байгаа билээ. Энэ удаа УИХ-ын гишүүн Болдын Жавхланг онцоллоо. Түүний хувьд Монголбанкны Тэргүүн дэд Ерөнхийлөгчөөр ажиллаж байсан бөгөөд 2016 оны УИХ-ын сонгуулиар Дархан-Уул аймгаас нэр дэвшиж, УИХ-ын гишүүнээр сонгогдсон юм. Өнгөрөгч дөрвөн жилийн хугацаанд төрийн түшээ тойрогтоо болон улс, эх оронд ямар ажлуудыг хийж, хэрэгжүүлснийг хүргэе.

НЭГ: ОНЦЛОХ ҮЙЛ ЯВДАЛ

“ЖДҮ-ГИЙН ХЭРЭГ”-ТЭЙ НЭР ХОЛБОГДСОН ГИШҮҮД ДАХИН НЭР ДЭВШИНЭ

Жил гаруйн өмнөөс ил болсон “ЖДҮ-гийн хэрэг”-т эрх баригч МАН-ын 49 гишүүн нэр холбогдсон байдаг. Энэ асуудалтай холбогдуулан Ерөнхий сайд, МАН-ын дарга У.Хүрэлсүх өөрийн байр суурийг илэрхийлэхдээ, “Жижиг дунд үйлдвэрлэлийг хөгжүүлэх сан /ЖДҮХС/-гаас зээл авсан УИХ-ын гишүүдээ 2020 оны УИХ-ын сонгуульд нэр дэвшүүлэхгүй” хэмээн албан ёсоор мэдэгдсэн.

Гэвч Ерөнхий сайд, МАН-ын дарга У.Хүрэлсүхийн дээрх мэдэгдэл биелэлээ олсонгүй. Тодруулбал, 2016 онд Дархан-Уул аймгаас УИХ-д сонгогдсон Д.Баттөмөр, Б.Жавхлан, Д.Хаянхярваа нарын гишүүдээс 2020 оны УИХ-ын ээлжит сонгуульд УИХ-ын гишүүн Б.Баттөмөр, Б.Жавхлан нар дахин нэр дэвшихээр болжээ.

2017.09.08

ЕРӨНХИЙ САЙД У.ХҮРЭЛСҮХИЙН “МИКРОФОН”

УИХ-ын ээлжит бус чуулган хуралдаж, Засгийн газрыг огцруулах асуудлыг хэлэлцсэн. Чуулганы хуралдаанаар Ерөнхий сайд Ж.Эрдэнэбатыг огцруулсны дараа Б.Жавхлан гишүүн “Шадар сайдын үүрэг гүйцэтгэгч У.Хүрэлсүхээр Ерөнхий сайдын үүрэг гүйцэтгүүлье” гэх горимын санал гаргахад “Хүрэлсүхийн микрофон хийхээ боль” гэх эсэргүүцэлтэй тулж байв. Энэ нь хууль тогтоогчийн хувьд хуулийн мэдлэггүйгээ харуулсан хэрэг байсан бөгөөд Сангийн сайдад санаархаж, хуулиас давсан санал гаргасан гэж хэвлэлүүд онцолж байлаа.

2017-10-10

Б.ЖАВХЛАН ХАРИУЦЛАГААС “БУЛТСАН” ГЭВ ҮҮ

УИХ-ын гишүүн Б.Жавхлан хариуцлагаас “бултсан” гэх асуудал нь Монголбанкны үйл ажиллагаанд хийсэн шалгалтын дүнтэй холбогддог.

Тодруулбал, УИХ-ын Эдийн засгийн байнгын хорооноос байгуулагдсан, УИХ-ын гишүүн Т.Аюурсайханаар ахлуулсан ажлын хэсэг 2016 онд Монголбанкны үйл ажиллагаанд шалгалт хийгээд гурван их наяд төгрөгийн хуримтлагдсан алдагдлыг улсад учруулсан гэх тооцоог гаргаж байв.

Шалгалтын мөрөөр Авлигатай тэмцэх газар ажиллаж, Монголбанкны ерөнхийлөгч асан Н.Золжаргалыг шалгах болсон. Гэвч таван жилийн турш хамт ажиллаж, хяналт шалгалтыг нь “базаж” байсан Монголбанкны тэргүүн дэд ерөнхийлөгч Б.Жавхлан ямар ч хариуцлага хүлээгээгүй өнгөрсөн байдаг.

Сөрөг хүчний зүгээс “Энэ зөрчлийг Монголбанкны тэргүүн дэд ерөнхийлөгчөөр ажилласан Б.Жавхлангаас ангид авч үзэж болохгүй” гэдэг байр суурийг илэрхийлж байсан ч Б.Жавхлан “Ажлаа өгснөөс маань хойш гарсан зөрчил” гэж тайлбарлаж байжээ.

ХОЁР. ЖДҮ-ТЭЙ ХОЛБОГДСОН ЭСЭХ: ТИЙМ!

БАРИМТ-1: УИХ-ЫН ГИШҮҮН Б.ЖАВХЛАН ЖДҮХС-ГААС ГУРВАН КОМПАНИД ЗЭЭЛ ОЛГОХОД НӨЛӨӨЛСӨН НЬ ХӨДЛӨШГҮЙ БАРИМТААР ТОГТООГДЖЭЭ

ЖДҮХС-гаас 2018 онд аж ахуйн нэгж, иргэдэд олгох ёстой зээлийг нэр бүхий улс төрчид хамаарал бүхий компаниуддаа олгуулахад нь нөлөөлсөн байж болзошгүй дуулиан өнөөг хүртэл тасраагүй. Прокурорын байгууллагад ЖДҮХС-тай холбоотой УИХ-ын 13 гишүүний хэрэг хянагдаж байгаа ч тэдэн дээр энэ парламентаас хэд хэдэн хүн нэмэгдсэн. Энэ хүмүүсийн хамгийн эхэнд УИХ-ын гишүүн Б.Жавхлан жагсдаг. Эх сурвалжийн мэдээлснээр “Б.Жавхлан гишүүн өөрийн хамаарал бүхий компаниудад тэрбум гаруй төгрөгийн зээл олгуулсан нь үнэн. Тухайн үеийн ХХААХҮ-ийн сайд Б.Батзориг болон ЖДҮХС-гийн захирал С.Төгсбилэг нартай найз нөхөр, албан тушаалын харилцаагаа ашиглан дээрх зээлийг “ногоон гэрлээр” шийдүүлсэн гэсэн юм. ЖДҮХС-гийн зээлийн асуудлыг хэвлэлийнхэн олон нийтэд дэлгэж байх үед Б.Жавхлан гишүүний нэр гарч байсан ч “Үндэслэл нь хангалттай нотлогдоогүй” шалтгаанаар хэргийг нь хэрэгсэхгүй болгож байжээ.

ЭНЭ ТАЛААР ЮУ ХЭЛЭВ?

Түүнийг ЖДҮХС-гаас “Пример инвестмент групп” ХХК-иар 900 сая, “Жетте майнинг” ХХК-д 800 сая, “Алтан олом” ХХК-д 250 сая төгрөг олгуулахад нөлөөлсөн тухай баримтыг хэвлэл мэдээллийн хэрэгслээр олон нийтэд ил болгосон. Энэ талаар УИХ-ын гишүүн Б.Жавхлан 2018 оны арваннэгдүгээр сарын 5-нд “…Өчигдрөөс эхлэн твиттер, фэйсбүүк, хэдэн сайтаар зохион байгуулалттайгаар надтай холбоотой мэдээлэл явууллаа. Харамсалтай юм болж байна. Миний нэр холбогдоод байгаа “Пример инвестмент групп” компанид хүсэлт тавьж, өчигдөр уулзлаа. Яах аргагүй Дархан-Уул аймагт үйл ажиллагаа явуулж байгаа, жижиг, дунд үйлдвэр мөн байна. Төрөөс явуулж буй Жижиг, дунд үйлдвэрлэлийг хөгжүүлэх хөтөлбөрт хамрагдсан нь үнэн байна. Миний хувьд ямар ч холбоо байхгүй. Тус компани анх 2014 онд байгуулагдсан юм байна. Миний хувьд 2010-2015 онд “Долоон болдог” ХХК-ийн бага хэмжээний хувьцаа эзэмшигч гэдгээ Хөрөнгө орлогын мэдүүлэгтээ мэдүүлж ирсэн. Харин 2015 оноос хувьцаа эзэмшихээ больсон. Тэгэхээр намайг холбогдуулаад байгаа “Пример инвестмент групп” компанитай би ямар ч холбоогүй” гэж байлаа.

БАРИМТ-2

Дээрх компаниудад зээл олгуулахын тулд Б.Жавхлан гишүүн ХХААХҮ-ийн сайд асан Б.Батзориг, ЖДҮХС-гийн захирал С.Төгсбилэг нар луу хамаарал бүхий компаниуддаа зээл гаргуулахыг утсаар захисан тухай эх сурвалжууд болон гэрчүүд хуулийн байгууллагад мэдээлсэн байна. Энэ нь ч баримтаар нотлогдоод байгаа. Ийн ярьсны хүчинд 2018 оны зургаадугаар сарын 8-нд ЖДҮХС-гийн Төрийн банк дахь 100900037019 данснаас “Пример инвестмент групп” ХХК руу “Зээл олгов” гэсэн тайлбартайгаар 900 сая төгрөг, 2018 оны наймдугаар сарын 17-нд “Жетте майнинг” ХХК руу дээрх байдлаар 800 сая төгрөг тус тус шилжүүлсэн нь гэрчийн мэдүүлэг болоод баримтаар нотлогджээ.

ГУРАВ. ТАНИЛЦ: УИХ-ЫН ГИШҮҮН Б.ЖАВХЛАНГИЙН УЛСЫН ИХ ХУРАЛД ӨРГӨН МЭДҮҮЛСЭН ХУУЛЬ, УИХ-ЫН ШИЙДВЭРИЙН ТӨСЛҮҮД

ДӨРӨВ. УИХ-ЫН ГИШҮҮН Б.ЖАВХЛАНГИЙН ТОЙРОГТОО АМЛАСАН МӨРИЙН ХӨТӨЛБӨР ХЭРЭГЖСЭН ҮҮ?

МАН-ЫН АРД ИРГЭДДЭЭ АМЛАСАН МӨРИЙН ХӨТӨЛБӨР:

• БИД ХАМТДАА
• ИРГЭДЭЭ ЯДУУРЛААС АВАРНА
• ЭДИЙН ЗАСГАА ХЯМРАЛААС ГАРГАНА
• ЭХ ОРНОО ӨРНӨӨС САЛГАНА
• ТӨРИЙН ДАМПУУРЛЫГ ЗАСНА
• ТЭГШ ЖУРАМ, БАЯН ХҮЧИРХЭГ МОНГОЛОО ЦОГЦЛООЖ ЧАДНА.

Энэхүү мөрийн хөтөлбөрт туссан АМЛАЛТУУД дөрвөн жилийн хугацаанд хэрэгжсэн үү. Тэр дундаа УИХ-ын гишүүн Б.Жавхлан тойрогтоо амласан мөрийн хөтөлбөрөө хэрэгжүүлж чадсан уу гэдгийг уншигч та дүгнэх учиртай.

ТАВ. МОНГОЛ УЛСЫН ИХ ХУРЛЫН ГИШҮҮН Б.ЖАВХЛАНГИЙН ХӨРӨНГӨ, ОРЛОГЫН ХУРААНГУЙ

Хөрөнгө орлогын мэдүүлэг 2018 оны байдлаар,

Б.Жавхлан гишүүний хувьд жилийн 20 гаруй сая төгрөгийн орлоготой. Харин гэр бүлийн гишүүдийн орлого 2017 онд огцом өсөж 137 сая төгрөгт хүрчээ. 2018 онд гэр бүлийн гишүүдийн орлогын хэмжээ дахин буурч 50 гаруй сая төгрөгийн орлого олсноо ХОМ-тээ мэдүүлжээ.