Johnson & Johnson компанийн бүтээсэн коронавирусийн эсрэг вакциныг цусны бүлэгнэлийн эрсдэл үүсгэдэг байж болзошгүй шалтгаанаар дархлаажуулалтын хөтөлбөртөө ашиглахыг түр зогсоож байгааг АНУ-ын эрх баригчид мэдэгджээ. Мөн Европын Холбоо, Өмнөд Африкийн Бүгд Найрамдах Улс ижил арга хэмжээг авсан байна.

Учир нь вакцин хийлгэсэн зургаан хүнд гаж нөлөө илэрсэн байна. Нэг өвчтөн нас барж, бусдынх нь биеийн байдал хүнд байгаа гэнэ. Зургаан тохиолдол нь 18-48 насны эмэгтэйчүүд бөгөөд вакцин тариулснаас нь хойш 6-13 хоногийн дараа цусны бүлэгнэлийн шинж тэмдэг илэрсэн байна.

Johnson & Johnson компанийн Жансен вакцин нь дэлхий дахинд хэрэглэж буй ихэнх вакцинаас ялгаатай нь хоёр тунгаар бус нэг удаагийн тунгаар хийдэг юм. Үүнээс гадна тээвэрлэх, хадгалах үйл явц илүү хялбар аж.

Дэлхийн Эрүүл Мэндийн Байгууллага нөхцөл байдлыг анхааралдаа авч, АНУ, Европын зохицуулах байгууллагуудын дүгнэлтийг хүлээж байгаагаа мэдэгдсэн байна.

АНУ-д 7 сая шахам хүн энэ вакциныг хийлгэсэн гэж Өвчнийг хянах, урьдчилан сэргийлэх үндэсний төвөөс мэдээллээ. Вакцинжуулалтын бүх төвд энэхүү вакцины хэрэглээг нэн даруй зогсоохоор болсон бөгөөд засгийн газрын мэргэжилтнүүд гаж нөлөөний шалтгааныг судлахаар болжээ.

Эх сурвалж: ВВС